Важни информации за YouTube Kids за родители

Ја создадовме YouTube Kids за да биде забавно место, соодветно за децата и за семејствата. Апликацијата YouTube Kids нуди популарни детски видеа и разновидни нови содржини, на начин што е лесен за користење за децата. 

Може да одлучите кое доживување на YouTube е најдоброто за вашето семејство. Дознајте повеќе за надгледуваните доживувања на YouTube.

Пред вашето дете да започне, има неколку работи што сакаме да ги знаете:

Профили на YouTube Kids

YouTube Kids им овозможува на најавените родители да создадат посебен профил за секое дете во домаќинството. Секој профил има посебна група поставки и препораки за гледање, со што повеќе деца може да го извлечат максимумот од апликацијата YouTube Kids.

Профилите се достапни на уредите на кои:

• родителот е најавен и
• апликацијата YouTube Kids е инсталирана.

Може да имате најмногу осум профили. Дознајте како да создадете профил.

Забелешка: Може да ја користите YouTube Kids и без да се најавувате.

Како се избираат видеата што се достапни на YouTube Kids?

Една опција е да му дозволите на вашето дете да ги истражува сите видеа на YouTube Kids. Родителите може да избираат помеѓу 3 поставки за содржини според возраста: 

• Предучилишна возраст (до 4 години)
• Помлади (од 5 до 8 години)
• Постари (од 9 до 12 години)

Нашите автоматизирани системи ги избираат содржините од шарениот свет на видеата на YouTube. Напорно работиме за да ги исклучиме содржините што не се соодветни за деца. Но, не можеме рачно да ги прегледаме сите видеа, а ниеден автоматизиран систем не е совршен. Ако најдете нешто несоодветно, може да го блокирате или да го пријавите за брз преглед.

Другата опција е самите да ги изберете содржините до кои вашето дете има пристап (Самите одобрете ги содржините). Ако ја изберете оваа опција, детето нема да може да пребарува. За повеќе информации за тоа како да ја примените оваа опција, погледнете го водичот на YouTube Kids за родителските контроли и поставки.

Изберете ја опцијата што мислите дека е најдобра за вашето дете. Може да ги смените овие поставки во секое време. Ви нудиме и разни алатки и поставки, опишани подолу, кои може да ги користите за дополнително контролирање на доживувањето на вашето дете. Дознајте повеќе за родителските контроли и поставки.
 

Како децата откриваат видеа во YouTube Kids?

Видеата во YouTube Kids може да се откриваат на неколку начини:

Пребарување

Кога ќе го вклучите пребарувањето, му дозволувате на вашето дете да наоѓа и да гледа милиони видеа што се достапни во YouTube Kids. Овие видеа ги избира специјален алгоритам, дизајниран да прикажува релевантни и соодветни резултати.

Меѓутоа, видеата достапни преку пребарувањето не се прегледуваат рачно. YouTube се справува со неверојатно голем обем на содржини. Затоа, иако напорно работиме да го понудиме најдоброто, можно е понекогаш вашето дете да најде содржини што вие не би сакале да ги гледа.

За да го ограничите пристапот на вашето дете на построго ограничен број видеа, може да го исклучите пребарувањето во родителските поставки. Ако го исклучите пребарувањето, вашето дете ќе има пристап само до каналите што биле потврдени од YouTube Kids. Имајте предвид дека без разлика на статусот на пребарувањето во вашата апликација, секогаш постои можност вашето дете да најде содржини што вие не би сакале да ги гледа.

Забелешка: Кога ќе го исклучите пребарувањето, вашата историја на гледање и историја на пребарување ќе се избришат, како и видеата во Препорачани и во Гледајте повторно.

Покрај исклучувањето на пребарувањето, YouTube Kids нуди повеќе родителски контроли за да ви помогне да го изберете вистинското доживување за вашето дете. Дознајте повеќе за родителските контроли и поставки.

Видеа на почетниот екран

Видеата на почетниот екран се групирани во категории како што се „Серии“ и „Музика“. YouTube Kids може периодично да воведува привремени категории како „Читање“ во чест на месецот за читање. Апликацијата ги избира овие видеа со специјално обучен алгоритам и одредени рачни прегледи. Видеата може да се рангираат според она што вашето дете го гледало или пребарувало. Овие видеа се само мал дел од милионите видеа достапни на YouTube Kids.

Ако сте ја избрале поставката „Само одобрени содржини“, ќе има само една категорија на почетниот екран на вашето дете. Во оваа категорија, наречена „Одобрено за тебе“, се наоѓаат содржините што сте ги избрале.

Препорачани видеа

Препорачаните видеа ги избира нашиот алгоритам и не се секогаш рачно прегледувани. Препорачаните видеа се прикажуваат кога пребарувањето е вклучено или исклучено и се прикажани како дополнителна категорија на почетниот екран, откако ќе бидат прегледани повеќе видеа во YouTube Kids. Препорачаните видеа исто така може да се појават во четирите категории видеа на почетниот екран или како предлози за гледање за вашето дете, откако тоа ќе погледне некои од видеата на почетниот екран или ќе пребара некое видео. Препорачаните видеа се засноваат врз она што било гледано или пребарувано во апликацијата и секогаш потекнуваат од видеата што се достапни во YouTube Kids.

Може да ги ресетирате препорачаните видеа така што ќе ја избришете историјата на апликацијата во родителските поставки. Имајте предвид дека кога ќе го исклучите пребарувањето, препорачаните видеа ќе се избришат заедно со историјата на гледање и пребарување.

Кога е вклучена поставката Паузирај „Историја“, апликацијата ќе престане да ги користи новите видеа што ги гледате или поимите што ги пребарувате при избирањето препорачани видеа. Може да ја вклучите или исклучите поставката Паузирај „Историја“  во родителските поставки.

Може да создадете посебен профил за секое дете, за да може да добива персонализирани препораки.

Ако профилот на вашето дете е поставен на „Само одобрени содржини“, препорачаните видеа ќе доаѓаат само од содржините што сте ги одобриле за вашето дете. Дознајте повеќе за препорачаните видеа.

Гледајте повторно

Гледајте повторно му овозможува на вашето дете да избира од видеата што биле претходно гледани во апликацијата.

Може да ги ресетирате видеата во Гледајте повторно така што ќе ја избришете историјата на апликацијата во родителските поставки. Имајте предвид дека кога ќе го исклучите пребарувањето, видеата во Гледајте повторно ќе бидат избришани заедно со историјата на гледање и пребарување.

Кога е вклучена поставката Паузирај „Историја“, апликацијата ќе престане да ги користи новите видеа што ги гледате или поимите што ги пребарувате при избирањето видеа во Гледајте повторно. Може да ја вклучите или исклучите поставката Паузирај „Историја“  во родителските поставки.

Може да создадете посебен профил за секое дете, за да може да добива персонализирани препораки.

Кои родителски контроли се достапни во YouTube Kids?

Вклучивме функции што ви овозможуваат да го приспособувате доживувањето на YouTube Kids за вашето дете. На пример, може да поставите тајмер за да го ограничите времето што детето го поминува на апликацијата. Другите контроли опфаќаат:

• родителски код
• блокирање содржини
• ограничување на пристапот само до одобрените содржини
• исклучување на пребарувањето
• бришење на историјата
• паузирање на историјата

Дознајте повеќе за родителските контроли и поставки.

Какви реклами се појавуваат во YouTube Kids?

Овозможуваме ограничени платени реклами („Платени реклами“) во апликацијата за да може да ја нудиме бесплатно. Кога вашето дете ќе пушти видео во апликацијата, може да види вовед во реклама по кој ќе следи Платена реклама, означена како „Реклама“. Овие Платени реклами мора да ги следат нашите правила за рекламирање, кои, на пример, исклучуваат одредени категории како храна и пијалаци. Дознајте повеќе за рекламите во YouTube Kids и нашите правила за рекламирање.

Видеата прикачени од корисниците на YouTube не се Платени реклами и затоа не се означени како „Реклама“ и не подлежат на нашите правила за рекламирање. Овде може да спаѓаат и содржини за или од компании што можеби купиле реклами во апликацијата. На пример, ако пребарате „возови“, може да добиете резултати со цртани филмови за возови, песни и видеа од вистински возови прикачени од корисник или од компанија за производство на возови играчки, но нив не ги сметаме за платени реклами, бидејќи не се дел од рекламната програма на YouTube Kids. Слично на тоа, ако пребарувате „чоколадо“, може да ви се прикаже видео прикачено од корисник во кое се прикажува како се прави чоколаден прелив, иако не дозволуваме платени реклами од изработувачите на чоколадни производи. Дознајте повеќе за видеата на YouTube Kids.

Ако сакате да гледате видеа без платени реклами со вашето дете, пробајте ја апликацијата YouTube Kids со YouTube Premium. Дознајте повеќе.

Прибирање и користење информации и лични податоци на YouTube Kids

За целосни информации за нашата практика за податоци, може да го погледнете „Известувањето за приватност“ на YouTube Kids. Ова известување може да го најдете на kids.youtube.com/t/privacynotice или во поставките на апликацијата, во делот „Приватност“.

Преземаме мерки на претпазливост за да ја заштитиме приватноста на корисниците на нашата апликација. Важно е родителот или законскиот старател на детето кое ќе ја користи апликацијата да го прочита ова известување пред детето да започне со користењето. Ако не сте родител или законски старател на детето кое ќе ја користи YouTube Kids или ако не се согласувате со нашите практики за заштита на приватноста, не дозволувајте му на детето да ја користи апликацијата.

Со оваа апликација управува Google LLC, со адреса на 1600 Amphitheatre Pkwy, Mountain View, CA 94043, United States.