Kapag napag-link mo na ang iyong Google Analytics account at Google Ads account, makakapag-import ka ng data ng Google Analytics sa Google Ads at makikita mo ang data na ito sa iyong Google Ads account. Ang data na ito ay makakapagbigay sa iyo ng mga insight at posibleng pagkakataon para ma-optimize ang campaign mo.
Magbibigay sa iyo ang artikulong ito ng pangkalahatang-ideya tungkol sa kung paano makakatulong ang data ng Google Analytics sa Google Ads account mo. Kapag handa ka na, puwede mong sundin ang mga tagubilin para magdagdag ng mga column ng Google Analytics sa iyong mga ulat.
Paano ito gumagana
Para makita ang data ng Google Analytics sa Google Ads, kakailanganin mo munang i-enable ang auto-tagging para sa iyong Google Ads account, ipag-link ang Google Ads account at Google Analytics account mo, at piliin ang mga view ng Google Analytics na pagmumulan ng ii-import na mga sukatan ng site. Pagkatapos, magdaragdag ka ng mga column ng Google Analytics sa iyong mga ulat sa Google Ads.
Sa pamamagitan ng pagtingin sa mga sukatang ito ng pakikipag-ugnayan sa site ng Google Analytics kasama ng mga detalye ng iyong performance sa Google Ads, makikita mo kung ano ang ginagawa ng mga tao pagkatapos nilang mag-click sa iyong ad at marating ang landing page mo. Narito ang uri ng data na puwede mong makita:
- Bounce rate: Kapag isang page lang ang nakita o isang event lang ang na-trigger ng isang tao, itinuturing itong "bounce" ng Analytics. Ang Bounce Rate ng iyong site ay ang porsyento ng mga session na nagba-bounce.
- Avg. na tagal ng session (segundo): Ang average na oras na itinagal ng isang tao sa iyong site.
- Mga page/session: Ang average na bilang ng mga page na tiningnan sa bawat session.
- % mga bagong session: Ang tinantyang porsyento ng mga unang beses na session.
Nakakatulong ang impormasyong ito na maipakita sa iyo kung gaano kaepektibo ang mga campaign at ad group mo. At nakakatulong iyon sa iyong magpasya tungkol sa mga badyet, bid, landing page, at ad text mo.
Halimbawa, ang pagtingin sa bounce rate ng isang ad group kasabay ng clickthrough rate (CTR) nito ay makakapagbigay sa iyo ng ideya kung nakikita ba ng mga customer mo ang inaasahan nila sa iyong site pagkatapos nilang i-click ang ad mo.
Handa ka na bang magdagdag ng data ng Google Analytics sa iyong mga ulat sa Google Ads? Sundin ang mga tagubilin para magdagdag ng data ng Google Analytics sa iyong mga ulat sa Google Ads.
Halimbawa
Nagbebenta si Dan ng mga bulaklak online. Ang isa sa kanyang mga campaign ay nakatuon sa mga bulaklak para sa kaarawan at nag-eeksperimento siya ng iba't ibang tema ng keyword para mahanap ang magdadala sa kanya ng pinakamaraming benta. Nakatuon ang isa sa kanyang mga ad group sa "mga bouquet para sa kaarawan," habang naglalaman ang isa pa ng mga keyword at ad na nauugnay sa "mga pag-aayos ng bulaklak para sa kaarawan."
Nang tingnan niya ang kanyang clickthrough rate para sa dalawa, nakita niyang mas maraming tao ang nagki-click sa mga ad ng ad group na “bouquet” kaysa sa mga nagki-click sa mga ad ng ad group na “pag-aayos ng bulaklak.” Noong una, sa palagay niya ay mas matagumpay ang ad group na "bouquet." Pero nang idinagdag niya ang column na Bounce Rate (batay sa data ng Google Analytics) sa kanyang ulat na ad group, nakakita si Dan ng bagong mahalagang impormasyon.
Bagama't mas mataas ang CTR ng mga ad sa ad group na "bouquet," 8%, kung ihahambing sa CTR ng mga ad na "mga pag-aayos ng bulaklak," 6%, mas mataas din ang bounce rate ng ad group na "bouquet" (60%). Nangangahulugan ito na mahigit sa kalahati ng mga taong dumarating sa kanyang site mula sa mga pag-click sa ad group na "mga bouquet" ang hindi nagtatagal para maging mas pamilyar sa site o bumili.
Sa madaling salita, posibleng nakakakuha nga ng maraming pag-click ang ad group na “bouquet,” pero baka hindi ito ang mga uri ng pag-click na hinahanap ni Dan. Nakita niyang mas mababa ang Bounce Rate ng ad group na "pag-aayos ng bulaklak" (30%), na ibig sabihin na ang mga taong nag-click patungo sa kanyang site mula sa mga ad na iyon ay mas malamang na manatili sa kanyang site at mag-explore.
| "Tema" ng Ad Group | Mga Impression | CTR | Mga Pag-click sa Ad | Bounce Rate | Mga user na hindi nag-bounce |
| mga bouquet para sa kaarawan | 1,000 | 8% | 80 | 60% | 32 |
| mga pag-aayos ng bulaklak para sa kaarawan | 1,000 | 6% | 60 | 30% | 42 |
Bagama't mas kaunting pag-click ang nakukuha ng ad group na "pag-aayos ng bulaklak," para kay Dan, mas mahalaga ito, dahil nakakahimok ito ng mga pag-click mula sa mga taong nananatili para i-explore ang kanyang website.
Higit pa tungkol sa data ng Google Analytics sa Google Ads
Mga pagkakaiba ng data ng Google Ads at Google AnalyticsMay pagkakataong posibleng hindi tumugma ang iyong data ng Google Ads sa na-import mong data ng Google Analytics. Narito ang ilan sa mga pinakakaraniwang dahilan:
- Mga pag-click ang sinusubaybayan ng Google Ads, habang mga session naman ang sinusubaybayan ng Google Analytics. May ilang dahilan kung bakit puwedeng maging magkaiba ang mga sukatang ito:
- Posibleng may customer na mag-click sa iyong ad nang maraming beses. Kapag maraming beses na magki-click ang isang tao sa isang advertisement sa iisang session, magtatala ang Google Ads ng maraming pag-click habang ituturing naman ng Google Analytics na isang session ang magkahiwalay na pageview.
- Posibleng may isang taong mag-click sa isang ad, at saka direktang bumalik sa site sa ibang pagkakataon, sa ibang session, sa pamamagitan ng bookmark o naka-save na link. Maitatala ito bilang isang pag-click sa Google Ads, pero bilang maraming session sa Analytics.
- Posibleng may mag-click sa iyong ad, pero magbago ng isip at itigil ang pag-load ng page sa pamamagitan ng pag-click sa ibang page o pagpindot sa mga button na Itigil o Bumalik ng browser. Sa ganitong sitwasyon, hindi magtatala ng session ang Analytics, pero ituturing pa rin ito ng Google Ads bilang isang pag-click.
- Para matiyak na mas tumpak ang pagsingil, awtomatikong fini-filter ng Google Ads ang mga invalid na pag-click sa iyong mga ulat.
- Posibleng kasama sa paghahambing ng mahahabang hanay ng petsa ang mga panahon kung kailan hindi magka-link ang iyong mga account.
Pagkatapos mong mag-import ng mga sukatan ng site para sa view ng Google Analytics na gusto mong makita sa Google Ads, medyo matagal bago ma-import at matingnan sa Google Ads ang data. Puwede mong tingnan ang mensahe ng status sa column na “Mga Pagkilos” ng talahanayan ng pag-uulat sa ilalim ng “Mga naka-link na account” > “Google Analytics” sa Google Ads. Kadalasan, hindi aabutin nang isang oras bago makita ang data at mga column sa Google Ads, pero posibleng mas tumagal ang proseso para sa mas malalaking account. Kapag na-import na ang data, puwede kang magdagdag ng data ng Google Analytics sa iyong mga ulat sa Google Ads.
Magsisimula ang Google Analytics na mangalap at mag-store ng data na partikular sa Google Ads kapag nakapag-link ka na ng Google Analytics account at Google Ads account. Kaya naman makakapag-import ka ng data ng Google Analytics sa Google Ads basta't napag-link mo na ang iyong Google Ads account at Analytics account.
Halimbawa
Kung nag-link ka ng source sa gastos noong Mayo 1, at pagkatapos ay nagsimula kang mag-import ng data ng Google Analytics sa Google Ads account mo noong Mayo 15, isasama sa iyong mga ulat sa Google Ads ang data ng Google Analytics simula noong Mayo 1.
Ang puwede lang lumabas sa Google Ads ay data ng Google Analytics na nakolekta at naproseso mula Mayo 2016.Bagama't karaniwang tuloy-tuloy na nagpoproseso ng data ang Google Analytics sa buong araw, puwedeng abutin nang hanggang 24 na oras bago ma-update ang lahat ng data. Halimbawa, kung magpapatakbo ka ngayong 3pm ng ulat para "kahapon," posibleng hindi pa lahat maisama sa iyong ulat ang ilang data mula kahapon (partikular na, mula 3pm hanggang hatinggabi).
