Gusto naming patuloy na masiyahan at maging malikhain ang mga creator, ngunit hinihiling naming sundin mo ang aming Mga Alituntunin ng Komunidad. Dapat ay palagi mong pag-isipan ang content na ipo-post mo online at humingi ng pahintulot bago ka mag-upload ng video na nagtatampok ng isang tao sa YouTube.
Ang sinumang nagpo-post ng content na may mga menor de edad ay dapat gawin ang sumusunod:
- Igalang ang privacy. Humingi ng pahintulot mula sa magulang o legal na tagapag-alaga ng menor de edad bago siya itampok sa iyong video. Tiyaking kusang-loob ang kanyang paglahok sa iyong video.
- I-moderate ang mga komento ng user sa iyong mga video. May mga tool na puwede mong gamitin para mag-filter at magsuri ng mga komento, at puwede kang mag-flag ng mga komento sa amin anumang oras para sa pag-spam o pang-aabuso.
- Pamahalaan ang mga setting sa privacy at pag-embed ng iyong video. May ilang opsyon ka para makontrol kung sino ang puwedeng manood ng iyong video at kung paano ito maibabahagi sa mga external na site.
Pakitiyak na nauunawaan at sinusunod mo ang batas. Dapat kang sumunod sa lahat ng batas, panuntunan, at regulasyong may kaugnayan sa pagtatrabaho kasama ng mga menor de edad. Ang ilang aspetong dapat mong malaman ay ang:
- Mga Pahintulot: Suriin ang mga lokal na batas at regulasyon para malaman kung nangangailangan ng pahintulot, pagpaparehistro, o lisensya ang mga menor de edad sa iyong mga video para makapagtrabaho. Dapat ay alam mo rin kung kailangan mo ng pahintulot para makakuha ng mga menor de edad para sa trabaho.
- Pagbabahagi ng Sahod/Kita: Dapat mong sundin ang mga naaangkop na batas patungkol sa pagbabayad sa mga menor de edad para sa kanilang trabaho. Sa ilang sitwasyon, maaaring kailanganing magbigay ka ng sahod sa mga menor de edad. Sa iba pa, maaaring kailanganing direkta kang magbigay ng bahagi ng iyong kita mula sa mga video sa mga menor de edad, o magtabi ng bahaging iniingatan para sa menor de edad.
- Paaralan at Edukasyon: Dapat makasunod sa lahat ng naaangkop na batas ang paglahok ng mga menor de edad sa iyong content para hindi ito makasagabal sa pagkuha ng sapat na pag-aaral at edukasyon.
- Kapaligiran ng Pinagtatrabahuhan, Mga Oras at Pahinga: Dapat ay ligtas ang kapaligiran ng pinagtatrabahuhan para sa mga menor de edad. Dapat ay mayroon silang oras para sa pagpapahinga, pag-aaral, at paglilibang bawat araw. Hindi dapat magtrabaho hanggang gabi ang mga menor de edad. Dapat mo ring sundin ang lahat ng lokal na batas para sa mga oras ng trabaho at mga limitasyon sa mga oras na nagtrabaho sa bawat araw/linggo.