ខ្លឹមសារដែលមានចេតនាលក់អាវុធ ណែនាំអ្នកមើលអំពីរបៀបផលិតអាវុធ គ្រាប់រំសេវ និងគ្រឿងគួបផ្សំជាក់លាក់ ឬណែនាំអ្នកមើលអំពីរបៀបដំឡើងគ្រឿងគួបផ្សំទាំងនោះ មិនត្រូវបានអនុញ្ញាតនៅលើ YouTube ទេ។ YouTube មិនគួរត្រូវបានប្រើជាប្រព័ន្ធសម្រាប់លក់អាវុធ ឬគ្រឿងគួបផ្សំដែលបានកត់ចំណាំខាងក្រោមនេះឡើយ។ YouTube ក៏មិនអនុញ្ញាតការផ្សាយបន្តផ្ទាល់ដែលបង្ហាញនរណាម្នាក់កំពុងកាន់ ចាត់ចែង ឬដឹកជញ្ជូនកាំភ្លើងដែរ។
ជួនកាល ខ្លឹមសារមិនបំពានគោលការណ៍របស់យើងទេ ប៉ុន្តែខ្លឹមសារនោះប្រហែលជាមិនសមរម្យសម្រាប់អ្នកមើលដែលមានអាយុក្រោម 18 ឆ្នាំ។ ខ្លឹមសារដែលមានការដាក់កំហិតអាយុនៅលើ YouTube ដែលបង្ហាញពីការប្រើកាំភ្លើង និងគ្រឿងគួបផ្សំជាក់លាក់មួយចំនួនក៏ត្រូវបានកត់ចំណាំនៅខាងក្រោមផងដែរ (ចំណាំ៖ ការដាក់កំហិតនេះអនុវត្តចំពោះតែការប្រើកាំភ្លើងពិតប៉ុណ្ណោះ ព័ត៌មានលម្អិតមាននៅខាងក្រោម)។ ក្នុងករណីមួយចំនួន យើងអាចធ្វើការលើកលែងចំពោះខ្លឹមសារដែលមានបរិបទអប់រំ ឯកសារ វិទ្យាសាស្ត្រ ឬសិល្បៈ រួមទាំងខ្លឹមសារដែលជាប្រយោជន៍សាធារណៈ។
តើវាមានន័យយ៉ាងណាសម្រាប់អ្នក
ប្រសិនបើអ្នកកំពុងបង្ហោះខ្លឹមសារ
កុំបង្ហោះខ្លឹមសារនៅលើ YouTube ប្រសិនបើមានគោលបំណងធ្វើរឿងមួយឬច្រើនដូចខាងក្រោម៖
- លក់កាំភ្លើង ឬគ្រឿងគួបផ្សំកាំភ្លើងជាក់លាក់តាមរយៈការលក់ដោយផ្ទាល់ (ឧ. ការលក់ឯកជនដោយបុគ្គល) ឬតំណទៅកាន់គេហទំព័រដែលលក់ទំនិញទាំងនេះ។ គ្រឿងគួបផ្សំទាំងនេះអាចរួមមាន៖
- គ្រឿងគួបផ្សំដែលធ្វើឱ្យកាំភ្លើងអាចបាញ់ដោយស្វ័យប្រវត្តិ
- គ្រឿងគួបផ្សំដែលបំប្លែងកាំភ្លើងឱ្យអាចបាញ់ដោយស្វ័យប្រវត្តិ ដូចជាស្វាយកាំភ្លើង (bump stocks), កៃកាំភ្លើងយន្ត (gatling triggers), គ្រឿងកែកាំភ្លើងឱ្យបាញ់ស្វ័យប្រវត្តិ (drop-in auto sears) ឬឈុតគ្រឿងកែច្នៃកាំភ្លើង
- បង់ដែលមានសមត្ថភាពខ្ពស់ ឬខ្សែក្រវាត់ដែលអាចផ្ទុកបានច្រើនជាង 30 ជុំ។
- ផ្ដល់ការណែនាំអំពីការផលិតរបស់ដូចខាងក្រោម៖
- កាំភ្លើង
- គ្រាប់រំសេវ
- បង់ដែលមានសមត្ថភាពខ្ពស់
- កាណុងត/កាណុងបន្ថយសំឡេងដែលផលិតនៅផ្ទះ
- គ្រឿងគួបផ្សំដែលធ្វើឱ្យកាំភ្លើងអាចបាញ់ដោយស្វ័យប្រវត្តិ
- គ្រឿងគួបផ្សំដែលបំប្លែងកាំភ្លើងឱ្យអាចបាញ់ដោយស្វ័យប្រវត្តិ ដូចជាស្វាយកាំភ្លើង (bump stocks), កៃកាំភ្លើងយន្ត (gatling triggers), គ្រឿងកែកាំភ្លើងឱ្យបាញ់ស្វ័យប្រវត្តិ (drop-in auto sears) ឬឈុតគ្រឿងកែច្នៃកាំភ្លើង។
- ផ្ដល់ការណែនាំអំពីរបៀបបំប្លែងកាំភ្លើងឱ្យអាចបាញ់ដោយស្វ័យប្រវត្តិ ឬមានសមត្ថភាពធ្វើត្រាប់ការបាញ់ស្វ័យប្រវត្តិ។
- ផ្ដល់ការណែនាំអំពីរបៀបដំឡើងគ្រឿងគួបផ្សំ ឬការកែច្នៃដែលបានរៀបរាប់ខាងលើ។
- ផ្ដល់ការណែនាំអំពីរបៀបដកឧបករណ៍សុវត្ថិភាពរបស់កាំភ្លើងចេញ ដូចជា ឧបករណ៍ដែលទប់ការរបូតរបស់បង់ជាដើម។ នេះមិនរាប់បញ្ចូលការដកឧបករណ៍ដែលប្រើដើម្បីបិទដំណើរការអាវុធជាបណ្ដោះអាសន្ននោះទេដូចជា សោកាំភ្លើងជាដើម។
សូមចំណាំថានេះមិនមែនជាបញ្ជីពេញលេញទេ។
ខ្លឹមសារដែលមានការដាក់កំហិតអាយុ
ជួនកាល ខ្លឹមសារមិនបំពានគោលការណ៍របស់យើងទេ ប៉ុន្តែខ្លឹមសារនោះប្រហែលជាមិនសមរម្យសម្រាប់អ្នកមើលដែលមានអាយុក្រោម 18 ឆ្នាំ។
- ខ្លឹមសារដែលបង្ហាញពីការប្រើកាំភ្លើងផលិតនៅផ្ទះ (ឧ. កាំភ្លើងដែលផលិតចេញពីម៉ាស៊ីនបោះពុម្ព 3D) កាំភ្លើងស្វ័យប្រវត្តិ ឬគ្រឿងគួបផ្សំណាមួយក្នុងចំណោមគ្រឿងគួបផ្សំខាងក្រោម៖
- គ្រឿងគួបផ្សំដែលធ្វើឱ្យកាំភ្លើងអាចបាញ់ដោយស្វ័យប្រវត្តិ
- គ្រឿងគួបផ្សំដែលបំប្លែងកាំភ្លើងឱ្យអាចបាញ់ដោយស្វ័យប្រវត្តិ ដូចជាស្វាយកាំភ្លើង (bump stocks), កៃកាំភ្លើងយន្ត (gatling triggers), គ្រឿងកែកាំភ្លើងឱ្យបាញ់ស្វ័យប្រវត្តិ (drop-in auto sears) ឬឈុតគ្រឿងកែច្នៃកាំភ្លើង
- បង់ដែលមានសមត្ថភាពខ្ពស់
- កាណុងត/កាណុងបន្ថយសំឡេងដែលផលិតនៅផ្ទះ
- ឧទាហរណ៍ (មិនពេញលេញ)៖
- ការបាញ់កាំភ្លើងដែលផលិតចេញពីម៉ាស៊ីនបោះពុម្ព 3D
- ការបាញ់កាំភ្លើងស្វ័យប្រវត្តិពេញលេញ
- ការបាញ់កាំភ្លើងមានបង់ដែលមានសមត្ថភាពខ្ពស់
គោលការណ៍ណែនាំទាំងនេះអនុវត្តចំពោះការប្រើកាំភ្លើងពិត និងមិនអនុវត្តចំពោះ ឧទាហរណ៍ ការប្រើកាំភ្លើងក្នុងខ្លឹមសារសិល្បៈឡើយ ដូចជាភាពយន្តជាដើម។
ខ្លឹមសារអប់រំ ឯកសារ វិទ្យាសាស្ត្រ ឬសិល្បៈ
ជួនកាល ខ្លឹមសារដែលបំពានគោលការណ៍នេះត្រូវបានអនុញ្ញាតឱ្យបន្តស្ថិតនៅលើ YouTube នៅពេលដែលខ្លឹមសារនោះមានបរិបទអប់រំ វីដេអូឯកសារ វិទ្យាសាស្ត្រ ឬសិល្បៈ (EDSA)។ យើងក៏អាចធ្វើការលើកលែងចំពោះខ្លឹមសារដែលជាប្រយោជន៍សាធារណៈ ដូចជានីតិវិធីសភាឬសភាតំណាងរាស្ត្រ សុន្ទរកថាក្នុងយុទ្ធនាការ ការជជែកដេញដោលអំពីចំណាត់ការរដ្ឋាភិបាលដែលកំពុងដំណើរការ វីដេអូយោធាឬប៉ូលិស វីដេអូព័ត៌មាន ឬវីដេអូពីសមរភូមិ។ ការធ្វើបែបនេះមិនមានន័យថាអនុញ្ញាតឱ្យផ្សព្វផ្សាយខ្លឹមសារដែលមានបំណងលក់អាវុធ ណែនាំអ្នកមើលអំពីរបៀបផលិតឬកែច្នៃអាវុធ គ្រាប់រំសេវ និងគ្រឿងគួបផ្សំជាក់លាក់ ឬណែនាំអ្នកមើលអំពីរបៀបដំឡើងគ្រឿងគួបផ្សំទាំងនោះទេ។
ឧទាហរណ៍
នេះគឺជាឧទាហរណ៍មួយចំនួនអំពីខ្លឹមសារដែលមិនត្រូវបានអនុញ្ញាតនៅលើ YouTube។
- តំណនៅក្នុងចំណងជើង ឬការពណ៌នារបស់វីដេអូអ្នកទៅកាន់គេហទំព័រដែលមានលក់កាំភ្លើង ឬគ្រឿងគួបផ្សំដែលបានកត់ចំណាំខាងលើ។ អ្នកអាចភ្ជាប់ទៅកាន់គេហទំព័រដែលពិភាក្សា ឬវាយតម្លៃទំនិញទាំងនេះ ដរាបណាគេហទំព័រទាំងនោះមិនលក់ ឬឱ្យទំនិញទាំងនោះដោយផ្ទាល់ទេ។
- ការបង្ហាញកាំភ្លើងក្នុងចេតនាលក់កាំភ្លើងនោះតាមរយៈការលក់ឯកជន។ ចំណុចនេះរាប់បញ្ចូលទាំងការផ្ដល់លេខទូរសព្ទ អាសយដ្ឋានអ៊ីមែល ឬព័ត៌មានទំនាក់ទំនងផ្សេងទៀតរបស់អ្នកលក់។
- ការបង្ហាញការណែនាំជាជំហានអំពីរបៀបផ្គុំតួផ្នែកខាងក្រោម (lower receiver) ដើម្បីបញ្ចប់ការផលិតកាំភ្លើងដល់អ្នកប្រើប្រាស់។
- ការបង្ហាញរបៀបផលិតកាណុងតដោយប្រើពិល កំប៉ុងប្រេង ឧបករណ៍សម្អាតកាណុង (solvent catcher) ឬផ្នែកផ្សេងទៀតដល់អ្នកប្រើប្រាស់។
- ការបង្ហាញដល់អ្នកប្រើប្រាស់អំពីរបៀបដំឡើងស្វាយកាំភ្លើង (bump stocks) ឬដំឡើងគ្រឿងគួបផ្សំស្រដៀងគ្នាដែលបានបង្កើតឡើងដើម្បីច្នៃឱ្យទៅជាបាញ់ដោយស្វ័យប្រវត្តិ។
- ការផ្សាយបន្តផ្ទាល់ដែលបង្ហាញនរណាម្នាក់កំពុងកាន់ ឬចាត់ចែងកាំភ្លើង ដោយមិនខ្វល់ថាពួកគេកំពុងបាញ់កាំភ្លើងនោះឬក៏អត់ឡើយ។ ចំណាំ៖ ចំណុចនេះមិនរាប់បញ្ចូលកាំភ្លើងនៅក្នុងវីដេអូហ្គេមឡើយ។
- ការផ្សាយបន្តផ្ទាល់ដែលបង្ហាញនរណាម្នាក់ដឹកជញ្ជូនកាំភ្លើងពីកន្លែងមួយទៅកន្លែងមួយទៀត ដូចជាតាមរយៈការកាន់ ឬធ្វើដំណើរដោយដាក់កាំភ្លើងទាំងនោះនៅក្នុងរថយន្តតូច រថយន្តធំ ឬយានយន្តផ្សេងទៀត។ ចំណាំ៖ ចំណុចនេះមិនរាប់បញ្ចូលកាំភ្លើងនៅក្នុងវីដេអូហ្គេមឡើយ។
សូមចងចាំថា ទាំងនេះគ្រាន់តែជាឧទាហរណ៍មួយចំនួនប៉ុណ្ណោះ ហើយកុំបង្ហោះខ្លឹមសារ ប្រសិនបើអ្នកគិតថា វាអាចបំពានគោលការណ៍នេះ។
តើមានអ្វីកើតឡើង ប្រសិនបើខ្លឹមសារបំពានគោលការណ៍នេះ
ប្រសិនបើខ្លឹមសាររបស់អ្នកបំពានគោលការណ៍នេះ យើងនឹងដកខ្លឹមសារនោះចេញ ហើយយើងនឹងផ្ញើអ៊ីមែលទៅអ្នក ដើម្បីប្រាប់ឱ្យអ្នកដឹង។ ប្រសិនបើយើងមិនអាចផ្ទៀងផ្ទាត់ថាតំណដែលអ្នកបង្ហោះមានសុវត្ថិភាពទេ យើងអាចនឹងដកតំណនោះចេញ។ សូមចំណាំថា URL បំពានដែលបានបង្ហោះនៅក្នុងវីដេអូផ្ទាល់ ឬនៅក្នុងទិន្នន័យមេតារបស់វីដេអូ អាចនឹងបណ្ដាលឱ្យដកវីដេអូនោះចេញ។
ប្រសិនបើនេះជាលើកទីមួយដែលអ្នកបំពានគោលការណ៍ណែនាំសហគមន៍របស់យើង អ្នកទំនងជានឹងទទួលបានការព្រមានដោយមិនមានការពិន័យចំពោះប៉ុស្តិ៍របស់អ្នកឡើយ។ អ្នកនឹងមានជម្រើសចូលរួមការបណ្ដុះបណ្ដាលអំពីគោលការណ៍ ដើម្បីឱ្យការព្រមាននេះផុតកំណត់បន្ទាប់ពី 90 ថ្ងៃ។ រយៈពេល 90 ថ្ងៃចាប់ផ្ដើមពីពេលដែលការបណ្ដុះបណ្ដាលបានចប់ មិនមែនពេលដែលការព្រមានត្រូវបានចេញនោះទេ។ ប៉ុន្តែប្រសិនបើគោលការណ៍តែមួយត្រូវបានបំពានក្នុងចន្លោះពេល 90 ថ្ងៃនោះ ការព្រមានអាចនឹងមិនផុតកំណត់ឡើយ ហើយប៉ុស្តិ៍របស់អ្នកអាចទទួលបានការពិន័យ។ ប្រសិនបើអ្នកបំពានគោលការណ៍ផ្សេងបន្ទាប់ពីបញ្ចប់ការបណ្ដុះបណ្ដាលនេះ អ្នកនឹងទទួលបានការព្រមានមួយទៀត។
ប្រសិនបើអ្នកទទួលបានការពិន័យចំនួន 3 ដងក្នុងរយៈពេល 90 ថ្ងៃ ប៉ុស្តិ៍របស់អ្នកអាចត្រូវបានបិទ។ ស្វែងយល់បន្ថែមអំពីប្រព័ន្ធពិន័យរបស់យើង។
យើងអាចបិទប៉ុស្តិ៍ ឬគណនីរបស់អ្នក ដោយសារការបំពានម្តងហើយម្តងទៀតលើគោលការណ៍ណែនាំសហគមន៍ ឬលក្ខខណ្ឌប្រើប្រាស់។ យើងក៏អាចបិទប៉ុស្តិ៍ ឬគណនីរបស់អ្នកផងដែរ បន្ទាប់ពីមានករណីបំពានធ្ងន់ធ្ងរតែមួយលើក ឬនៅពេលដែលប៉ុស្តិ៍ផ្ដោតលើតែការបំពានគោលការណ៍។ យើងអាចទប់ស្កាត់អ្នកបំពានម្ដងហើយម្ដងទៀតមិនឱ្យចូលរួមការបណ្ដុះបណ្ដាលអំពីគោលការណ៍នាពេលខាងមុខ។ ស្វែងយល់បន្ថែមអំពីការបិទប៉ុស្តិ៍ ឬគណនី។
ប្រសិនបើអ្នករកឃើញខ្លឹមសារដែលបំពានគោលការណ៍នេះ សូមរាយការណ៍អំពីខ្លឹមសារនោះ។ ការណែនាំសម្រាប់ការរាយការណ៍អំពីការបំពានគោលការណ៍ណែនាំសហគមន៍របស់យើងមាននៅត្រង់នេះ។ ប្រសិនបើអ្នកបានរកឃើញវីដេអូ ឬមតិមួយចំនួនដែលអ្នកចង់រាយការណ៍ អ្នកអាចរាយការណ៍ប៉ុស្តិ៍បាន។