Eins og við á um allar reglur geta þessar reglur tekið breytingum með tímanum.
Sé ekki sérstaklega kveðið á um annað hér fyrir neðan skulu vörur í „Það sem hægt er að gera“ sem notaðar eru í auglýsingaskyni einnig lúta reglum Google Ads.
Reglur um efni
Vörur
- Vörur í „Það sem hægt er að gera“ geta til dæmis verið ferðir, dægradvöl og aðgöngumiðar að öðrum áhugaverðum stöðum sem ferðamenn gætu haft áhuga á.
- Gögn frá samstarfsaðila um vöru þurfa að vera í samræmi við það sem er að finna á lendingarsíðu vörunnar og gefa rétta mynd af upplifun ferðamanna þegar þeir stunda viðkomandi dægradvöl.
- Aðeins er hægt að telja hverja vöru upp einu sinni í straumnum.
- Heiti vöru og myndir af henni verða að gefa rétta mynd af upplifuninni sem er í boði. Ef Eiffel-turninn kemur til dæmis fyrir í heiti vöru og myndum sem fylgja henni þarf Eiffel-turninn að vera hluti af upplifuninni.
- Forðast ber vörur sem eru nánast tvítekningar þar sem slíkar vörur geta ruglað notendur í ríminu og haft áhrif á einkunnagjöf varanna á síðunni.
- Heiti eiga að vera hnitmiðuð og einungis vísa til þeirrar upplifunar sem í boði er.
Myndir
- Myndir eiga að endurspegla staðinn eða dægradvölina og eiga ekki að innihalda kynningartexta, vatnsmerki eða lógó.
- Hreyfimyndir (til dæmis GIF-myndir) eða myndir sem samanstanda af mörgum myndum (til dæmis klippimyndir) eru ekki leyfðar.
- Myndir skulu vera að lágmarki 300 x 300 pixlar og að hámarki 4000 x 4000 pixlar.
- Samstarfsaðilum skal vera heimilt að nota myndina sem send er inn í því samhengi sem hún birtist í.
- Hver vara skal hafa sérstaka mynd. Til dæmis á einnar klukkustundar ferð um Eiffel-turninn að hafa aðra mynd en tveggja klukkustunda ferð.
Tímalengd
- Tilgreina þarf tímalengd fyrir allar vörur þar sem ferðin eða dægradvölin tekur tiltekinn eða fyrirsjáanlegan tíma, svo sem 25 mínútna þyrluferð. Tímalengdin skal samræmast þeirri tímalengd sem gefin er upp á lendingarsíðunni. Ef tímalengd ferðar eða dægradvalar er áætluð og breytileg skal velja neðri mörkin. Fyrir gönguferð sem tekur 2–3 klukkustundir skal þannig tilgreina 2 klukkustundir.
- Ekki á að tilgreina tímalengd fyrir aðgöngumiða þar sem ekki er um neina fasta eða fyrirsjáanlega tímalengd að ræða.
Einkunnir
- Fjöldi einkunna sem tilgreindur er á síðu vörunnar þarf að samsvara fjölda einkunna sem notendur geta skoðað.
- Allar einkunnir frá viðskiptavinum, hvort sem þær eru góðar eða slæmar, skulu teknar með á síðu vörunnar og í einkunninni sem þú sendir til Google. Ekki skal byggja einkunnir á fáum einkunnum frá viðskiptavinum sem hafa verið valdar til þess að styðja við tiltekið sjónarmið.
Reglur um upplifanir sem vísað er til
Lendingarsíður
- Samstarfsaðili verður að gefa upp lendingarsíðu sem vísar beint á vöruupplýsingar viðkomandi upplifunar. Listayfirlit yfir vöruupplýsingar er einnig leyfilegt ef neðangreind skilyrði eru uppfyllt.
- Þegar notandi lendir á vefsvæði samstarfsaðila þarf að vera auðvelt að finna vöruna sem notandinn smellti á í Google. Því ætti varan að vera áberandi á lendingarsíðunni.
- Auðvelt þarf að vera að finna verð vörunnar og það þarf að vera í samræmi við reglur um verð.
- Lendingarsíður fyrir vöruskrár sem endurspegla opinber vefsvæði þurfa jafnframt að vera í samræmi við reglur um opinber vefsvæði.
- Notandinn á að lenda á síðu þar sem einfalt er að komast í bókun á valinni vöru. Google gerir kröfu um samræmda framsetningu á vörunni og verðinu sem notendur velja og að skýr leið sé að bókun vörunnar sem fannst á Google.
- Þegar um er að ræða vörur sem birtast beint á fyrirtækjalista Google yfir rekstraraðila staða, ferða og dægradvalar, verður heiti staðarins eða rekstraraðilans að samræmast heitinu sem birtist á Google og það verður að vera auðvelt að finna það á lendingarsíðunni án þess að það krefjist frekari smella eða aðgerða af hálfu notandans.
- Öll vefsvæði samstarfsaðila eru hönnuð með ólíkum hætti. Til að lýsa betur kröfum um áberandi staðsetningu eru hér dæmi um það sem líklegt er að teljist sem áberandi staðsetning:
- Varan er stærri en aðrar vörur og er efst á síðunni.
- Varan er auðkennd á síðunni, annaðhvort með stærð eða ólíkum litum.
- Varan er fest hægra eða vinstra megin á síðunni og þannig aðgreind frá öðrum vörum.
- Forðastu uppsetningu sem felur lykilþætti á lendingarsíðunni. Til dæmis ættu sprettigluggar eða niðurhalsborðar ekki að hylja mikilvægar upplýsingar fyrir notendum eða beina athyglinni frá þeim.
Dæmi um viðunandi hönnun á lendingarsíðum:
Dæmi um hönnun á lendingarsíðu sem brýtur í bága við reglur:
Verð
Nánar um reglur varðandi verð í „Það sem hægt er að gera“.
Fyrirtækjastarfsemi sem sætir takmörkunum
- Vöruskráin verður að samræmast reglum Google, svo sem leiðbeiningum um hættulegar vörur og þjónustu og reglum um óviðeigandi efni. Sem dæmi má nefna að dægradvöl sem felur í sér sprengiefni, byssur, vopn, fíkniefni eða tóbak, eða ýtir undir hatur, umburðarleysi, mismunun eða ofbeldi er ekki leyfð.
- Eftirfarandi dægradvalir kunna að vera leyfðar í „Það sem hægt er að gera“ þótt þær séu alla jafna ekki leyfðar samkvæmt reglum Google Ads:
- Dægradvöl sem felur í sér áfengi (t.d. vín- eða bjórsmökkun) þar sem slíkt er leyfilegt.
- Bogfimi, axarkast, laser tag og litbolti.
- Dægradvöl með menningarlegt vægi sem felur í sér bannaðar vörur. Til dæmis skoðunarferð um vindlaverksmiðju eða heimsókn á tóbaksbúgarð.
- Starfsemi sem felst sérstaklega í almenningssamgöngum (svo sem ferðalög til og frá flugvelli, bílaþjónusta og bílaleigubílar) er ekki leyfð. Leyfilegt er að bjóða upp á ferðir sem fela í sér samgöngur, svo sem skoðunarferðir í rútu eða á bát. Samgönguþjónusta sem sérstaklega miðast við ferðaþjónustu, svo sem útleiga á hjólum, bátum, rafskutlum eða kajökum til þess að skoða sig um (en ekki til þess að ferðast á milli staða) er leyfileg.
- Miðar á einstaka eða óreglulega viðburði, svo sem Comic Con, tónleika, hátíðir eða UFC-bardaga, eru ekki leyfilegir. Endurteknir viðburðir á sama stað sem standa yfir í a.m.k. fjórar vikur, svo sem heimaleikir íþróttaliða, listamannadvalir, vikulegar sýningar eða árlegir viðburðir, eru leyfilegir.
- Sem stendur eru sýndarupplifanir sem ekki hafa neinn þátt í raunheimum ekki studdar. Vörurnar verða að eiga sér stað á raunverulegum stað. VR-/AR-upplifanir sem eiga sér stað á viðkomandi áhugaverðum stað eru leyfðar.
- Hótelgistingar og siglingar sem standa yfir í fleiri daga eru ekki gjaldgengar. Það á einnig við um orlofspakka í heimabyggð. Dagnýting á hótelaðstöðu, svo sem heimsókn í heilsulind, er heimil og einnig dægradvöl sem felur í sér gistingu ef gistingin er ekki megintilgangurinn, svo sem í nokkurra daga vínsmökkunarferð.
- Afsláttarmiðar fyrir einstakar máltíðir á veitingastöðum eru ekki heimilaðir. Skoðunarferðir sem snúast um matargerðarlist á viðkomandi stað eða matartengdir viðburðir eru leyfðir. Þar á meðal eru skoðunarferðir um hverfi þar sem komið er við í mörgum verslunum og veitingastöðum. Máltíðir eru leyfðar sem hluti af sýningu eða annarri upplifun.
- Ekki er heimilt að skrá vörur sem tengjast kosningum eða pólitískum viðburðum. Auglýsendum er jafnframt bent á að kynna sér reglur Google Ads varðandi pólitískt efni.
Nánar um reglur okkar um aðra fyrirtækjastarfsemi sem sætir takmörkunum.
Um reglur okkar
Í gegnum „Það sem hægt er að gera“ geta fyrirtæki af öllum stærðum, alls staðar í heiminum, kynnt fjölbreyttar vörur og vefsvæði á Google og dreifingarneti okkar. Við viljum auðvelda þér að ná til núverandi og væntanlegra viðskiptavina og markhópa. Með það fyrir augum að reyna að skapa notendum örugga og jákvæða upplifun hlustum við eftir ábendingum þeirra og athugasemdum varðandi þær skráningar sem þeir sjá. Jafnframt skoðum við reglulega breytingar á nethegðun, venjum innan atvinnugreina og reglum. Loks höfum við til hliðsjónar gildi okkar og menningu sem fyrirtækis, ekki síður en rekstrarlega, tæknilega og viðskiptalega þætti, þegar við semjum reglur okkar. Afraksturinn er reglur sem eiga við um allar skráningar á Google-netinu.
Google gerir þá kröfu til samstarfsaðila að þeir framfylgi öllum gildandi lögum og reglum, þ. á m. þeim sem lýst er hér fyrir ofan og öllum öðrum viðeigandi reglum Google. Mikilvægt er að þú kynnir þér og fylgist með þessum kröfum varðandi þá staði þar sem starfsemi þín fer fram, sem og aðra staði sem fram koma í skráningum þínum. Ef við finnum efni sem brýtur gegn reglunum kunnum við að loka fyrir birtingu þess og sé um að ræða endurtekin eða alvarleg brot kunnum við að loka reikningi þínum tímabundið eða til frambúðar.
Framfylgd reglna og áfrýjun
Reglum um „Það sem hægt er að gera“ er framfylgt með ýmsum sjálfvirkum athugunum og handvirkum athugunum af hálfu matsfólks. Allt eftir alvarleika brotsins getur refsiaðgerð verið frá því að loka fyrir birtingu skráningar á tilteknum einingum til þess að loka með öllu fyrir skráninguna.
Hægt er að nálgast lista yfir atriði sem Google hefur flaggað í miðstöðinni fyrir „Það sem hægt er að gera“. Ef þú ert ósammála þeim aðgerðum sem gripið hefur verið til eða ef vandamálið hefur verið lagfært geturðu óskað eftir því að varan verði skoðuð sérstaklega í miðstöðinni fyrir „Það sem hægt er að gera“ með því að velja vöruna og smella á hnappinn „Biðja um endurskoðun“ við hliðina á viðkomandi máli.
Þjónustuteymi okkar lýkur við endurskoðunina innan þriggja virkra daga og niðurstaðan verður aðgengileg í miðstöðinni fyrir „Það sem hægt er að gera“. Ef áfrýjunin skilar ekki árangri og þú vilt fara lengra með málið geturðu haft samband við ttd-support@google.com þar sem starfsfólk okkar getur aðstoðað þig.
Ef loka þarf reikningi vegna endurtekinna brota eða kerfisbundinna vandamála í tengslum við vörugæði fer fram handvirk endurskoðun af hálfu starfsfólks og haft verður beint samband við samstarfsaðila með tölvupósti til þess að upplýsa hann um stöðuna.