იმ შემთხვევაში, თუ გაქვთ YouTube Music ანგარიში, თქვენთვის შეიძლება გამოიყოს სივრცე სერვერზე, სადაც შეძლებთ თქვენი კომპიუტერიდან კონკრეტული ტიპის კონტენტის ატვირთვასა და შენახვას (მაგ. მუსიკალური ფაილები, რომლებიც შეიცავს მეტამონაცემებს და ალბომის ყდას) (შემდგომში „შენახული მუსიკალური კონტენტი“). სერვერზე ატვირთვის შემთხვევაში, შეინარჩუნებთ ყველა მიმდინარე უფლებას შენახულ მუსიკალურ კონტენტზე, ხოლო მისი ასლი თქვენი სახელით შეინახება. შენახული მუსიკალური კონტენტი თქვენთვის ხელმისაწვდომი იქნება YouTube Music ანგარიშის მეშვეობით. წვდომა გექნებათ მხოლოდ YouTube Music ანგარიშიდან და კონტენტის სხვებისთვის გაზიარებას ვერ შეძლებთ, მათ შორის, იმ YouTube მომხმარებლებისთვის, რომლებიც თქვენს Google ან YouTube საოჯახო გეგმაში არიან გაწევრიანებული. თქვენ მიერ YouTube Music-ზე ატვირთულ შენახულ მუსიკალურ კონტენტზე იურიდიული პასუხისმგებლობა გეკისრებათ თქვენ. ასეთი კონტენტი არ უნდა შეიცავდეს მესამე პირის ინტელექტუალურ საკუთრებას (მაგ. საავტორო უფლებებით დაცულ მასალას), გარდა იმ შემთხვევისა, როცა ამ პირისგან ნებართვა გაქვთ, ან სხვაგვარად გაქვთ ამის გაკეთების სამართლებრივი უფლება.
შესაძლოა, თქვენს შენახულ მუსიკალურ კონტენტში გარკვეული ცვლილებების შეტანა დაგვჭირდეს, რომ მისი დაკვრა შესაძლებელი იყოს YouTube Music-ში და YouTube Music აპზე. YouTube არ გაუზიარებს მესამე მხარეს თქვენს შენახულ მუსიკალურ კონტენტს.