ແມ່ນຫຍັງຄືຄວາມແຕກຕ່າງລະຫວ່າງບັນຊີທີ່ມີການເບິ່ງແຍງກວດກາ ແລະ ບັນຊີ YouTube ຫຼື YouTube Music ປົກກະຕິ?
ບັນຊີທີ່ມີການເບິ່ງແຍງກວດກາຂອງລູກຂອງທ່ານຈະມີລັກສະນະຄ້າຍກັບບັນຊີ YouTube ຫຼື YouTube Music ປົກກະຕິ ແຕ່ຄຸນສົມບັດ ແລະ ການຕັ້ງຄ່າທີ່ໃຊ້ໄດ້ຈະແຕກຕ່າງກັນໄປ.
ເນື້ອຫາທີ່ລູກຂອງທ່ານສາມາດຫຼິ້ນໄດ້ຈະຂຶ້ນກັບ ການຕັ້ງຄ່າເນື້ອຫາ ທີ່ທ່ານເລືອກສໍາລັບບັນຊີທີ່ມີການເບິ່ງແຍງກວດກາຂອງເຂົາເຈົ້າ. ຄຸນສົມບັດບາງຢ່າງທີ່ສາມາດໃຊ້ໄດ້ຕາມປົກກະຕິຢູ່ YouTube ແລະ YouTube Music ແມ່ນຈະບໍ່ສາມາດໃຊ້ໄດ້. ເພື່ອເບິ່ງລາຍຊື່ຂອງຄຸນສົມບັດທີ່ບໍ່ສາມາດໃຊ້ໄດ້, ໃຫ້ເຂົ້າໄປ ປະສົບການແບບມີການເບິ່ງແຍງກວດກາຢູ່ YouTube ແມ່ນຫຍັງ?.
ເນື່ອງຈາກການສະແດງອອກດ້ວຍຕົນເອງ ແລະ ຊຸມຊົນເປັນສ່ວນສຳຄັນຂອງ YouTube, ພວກເຮົາຈຶ່ງຮ່ວມມືກັບຜູ້ປົກຄອງ ແລະ ຜູ້ຊ່ຽວຊານເມື່ອຕັດສິນໃຈວ່າຄວນໃຫ້ຄຸນສົມບັດໃດນຳໃຊ້ໄດ້ໃນບັນຊີທີ່ມີການເບິ່ງແຍງກວດກາ.
YouTube Kids ແມ່ນຫຍັງ? ມັນແຕກຕ່າງຈາກບັນຊີທີ່ມີການເບິ່ງແຍງກວດກາຢູ່ YouTube ແນວໃດ?
YouTube Kids ແມ່ນແອັບຂອງພວກເຮົາທີ່ສ້າງຂຶ້ນມາໂດຍຄຳນຶງເຖິງເດັກນ້ອຍໂດຍສະເພາະ. ໂດຍນໍາໃຊ້ບັນຊີທີ່ມີການເບິ່ງແຍງກວດກາ, ພໍ່ແມ່ສາມາດເລືອກ ການຕັ້ງຄ່າເນື້ອຫາ ທີ່ຈໍາກັດສິ່ງທີ່ເດັກນ້ອຍສາມາດຊອກຫາ ແລະ ຫຼິ້ນຢູ່ YouTube ແລະ YouTube Music ໄດ້.
ວິດີໂອຢູ່ YouTube Kids ມີຄວາມຫຼາກຫຼາຍແຕ່ຕົວເລືອກວິດີໂອຈະໜ້ອຍກວ່າທີ່ມີໃຫ້ບໍລິການຢູ່ YouTube ແບບປົກກະຕິ. ວິດີໂອໄດ້ຮັບການຄັດເລືອກດ້ວຍວິທີທີ່ຫຼາກຫຼາຍ. ວິດີໂອເຫຼົ່ານີ້ໄດ້ຮັບການຄັດເລືອກໂດຍທີມງານກວດສອບ ແລະ ເປັນລາຍການຫຼິ້ນທີ່ຄັດສັນມາຈາກຜູ້ຊ່ຽວຊານ. ນອກຈາກນີ້, ການກັ່ນຕອງດ້ວຍອະກໍຣິທຶມຍັງຊ່ວຍເລືອກວິດີໂອທີ່ເໝາະສົມນຳ.
ເພື່ອສຶກສາເພີ່ມເຕີມກ່ຽວກັບຄວາມແຕກຕ່າງລະຫວ່າງ YouTube Kids ແລະ ບັນຊີທີ່ມີການເບິ່ງແຍງກວດກາ, ກະລຸນາເຂົ້າໄປ ເຂົ້າໃຈທາງເລືອກຂອງທ່ານໃນຖານະຄອບຄົວ.
ໂໝດຈໍາກັດແມ່ນຫຍັງ? ມັນແຕກຕ່າງຈາກບັນຊີທີ່ມີການເບິ່ງແຍງກວດກາຢູ່ YouTube ແນວໃດ?
ໂໝດຈໍາກັດ ແມ່ນການຕັ້ງຄ່າທາງເລືອກຢູ່ YouTube. ມັນຈະຊ່ວຍກັ່ນຕອງເນື້ອຫາສຳລັບຜູ້ໃຫຍ່ທີ່ທ່ານອາດຈະບໍ່ຕ້ອງການເຫັນ ຫຼື ບໍ່ຕ້ອງການໃຫ້ຄົນອື່ນທີ່ນໍາໃຊ້ອຸປະກອນຂອງທ່ານເຫັນ. ຜູ້ໃຊ້ທີ່ຕ້ອງການປະສົບການ YouTube ທີ່ຈຳກັດຍິ່ງຂຶ້ນ, ເຊັ່ນ: ຫ້ອງສະໝຸດ, ໂຮງຮຽນ ແລະ ສະຖາບັນສາທາລະນະ, ມັກຈະເປີດໂໝດຈໍາກັດ.
ຜູ້ປົກຄອງຂອງໄວຮຸ່ນທີ່ມີອາຍຸຫຼາຍກວ່າ 13 ປີ ເຊິ່ງ ເພີ່ມການເບິ່ງແຍງກວດກາ ໃສ່ບັນຊີ Google ຂອງໄວຮຸ່ນຍັງສາມາດໃຊ້ໂໝດຈຳກັດເພື່ອຊ່ວຍຄັດແຍກເນື້ອຫາທີ່ອາດເປັນເນື້ອຫາສຳລັບຜູ້ໃຫຍ່ໄດ້ນຳ.
ບັນຊີທີ່ມີການເບິ່ງແຍງກວດກາແມ່ນບໍ່ສາມາດໃຊ້ໄດ້ສຳລັບໄວຮຸ່ນທີ່ອາຍຸເກີນ ອາຍຸກ່ຽວຂ້ອງຢູ່ປະເທດ/ພາກພື້ນຂອງເຂົາເຈົ້າ ທີ່ໄດ້ເພີ່ມການເບິ່ງແຍງກວດກາໃສ່ບັນຊີ Google ທີ່ມີຢູ່ແລ້ວຂອງເຂົາເຈົ້າ. ບັນຊີທີ່ມີການເບິ່ງແຍງກວດກາແມ່ນສາມາດໃຊ້ໄດ້ສຳລັບເດັກນ້ອຍທີ່ມີອາຍຸຕໍ່າກວ່າ 13 ປີ (ຫຼື ອາຍຸກ່ຽວຂ້ອງຢູ່ປະເທດ/ພາກພື້ນຂອງເຂົາເຈົ້າ) ແລະ ອະນຸຍາດໃຫ້ນໍາໃຊ້ການຄວບຄຸມຂອງພໍ່ແມ່ເພື່ອຈັດການປະສົບການ YouTube ຂອງລູກເຂົາເຈົ້າ.
ແມ່ນຫຍັງຄືທາງເລືອກຂອງຂ້ອຍສຳລັບການຕັ້ງຄ່າເນື້ອຫາເມື່ອຂ້ອຍຕັ້ງບັນຊີທີ່ມີການເບິ່ງແຍງກວດກາສຳລັບລູກຂອງຂ້ອຍ?
ມີການຕັ້ງຄ່າເນື້ອຫາ 3 ແບບທີ່ທ່ານສາມາດເລືອກໄດ້:
- ສຳຫຼວດ: ໂດຍທົ່ວໄປແລ້ວຈະສອດຄ່ອງກັບການຈັດປະເພດເນື້ອຫາສຳລັບຜູ້ຊົມອາຍຸ 9 ປີຂຶ້ນໄປ. ວິດີໂອຮວມມີວຼັອກ, ສອນການນຳໃຊ້, ວິດີໂອການຫຼິ້ນເກມ, ມິວສິກວິດີໂອ, ຂ່າວ ແລະ ອື່ນໆ. ເຊິ່ງບໍ່ຮວມການຖ່າຍທອດສົດ, ຍົກເວັ້ນການສາຍຮອບປະຖົມມະທັດ. ລູກຂອງທ່ານຈະບໍ່ເຫັນ ຄຳເຫັນ ໃນວິດີໂອ. ວິດີໂອບາງລາຍການມີເນື້ອຫາຄວາມຮຸນແຮງເລັກນ້ອຍ, ພາສາທີ່ບໍ່ເໝາະສົມ ແລະ ສານຄວບຄຸມ. ນອກຈາກນັ້ນ, ວິດີໂອບາງລາຍການຍັງອາດມີເນື້ອຫາດ້ານການສຶກສາທີ່ກ່ຽວຂ້ອງກັບພາບລັກ ແລະ ການປ່ຽນແປງຂອງຮ່າງກາຍ, ສຸຂະພາບຈິດ ແລະ ສຸຂະພາບທາງເພດ.
- ສໍາຫຼວດເພີ່ມເຕີມ: ໂດຍທົ່ວໄປແລ້ວຈະສອດຄ່ອງກັບການຈັດປະເພດເນື້ອຫາສຳລັບຜູ້ຊົມອາຍຸ 13 ປີຂຶ້ນໄປ. ການຕັ້ງຄ່ານີ້ຈະສະແດງວິດີໂອໃນຂອບເຂດທີ່ກວ້າງຂຶ້ນ. ວິດີໂອຮວມມີການຖ່າຍທອດສົດ, ວຼັອກ, ສອນການນຳໃຊ້, ວິດີໂອການຫຼິ້ນເກມ, ມິວສິກວິດີໂອ, ຂ່າວ, ວິດີໂອດ້ານການສຶກສາ, DIY, ສິນລະປະ ແລະ ຫັດຖະກຳ, ການເຕັ້ນ ແລະ ອື່ນໆ. ວິດີໂອບາງລາຍການມີເນື້ອຫາຄວາມຮຸນແຮງໃນຊີວິດຈິງ, ຄຳຫຍາບຄາຍແບບຈຳກັດ ແລະ ສານຄວບຄຸມ. ນອກຈາກນີ້, ຍັງຮວມເຖິງການອ້າງອີງທາງເພດທີ່ບໍ່ຈະແຈ້ງ ແລະ ຫົວຂໍ້ທີ່ກ່ຽວຂ້ອງກັບສຸຂະພາບກາຍ, ສຸຂະພາບຈິດ, ຮວມທັງສຸຂະພາບທາງເພດ ແລະ ຄຸນນະພາບຊີວິດນຳ. ລູກຂອງທ່ານຈະເຫັນ ຄຳເຫັນ ໃນວິດີໂອ.
- ເນື້ອຫາສ່ວນໃຫຍ່ຂອງ YouTube: ການຕັ້ງຄ່ານີ້ຮວມ ເນື້ອຫາເກືອບທັງໝົດຢູ່ YouTube ຍົກເວັ້ນ ວິດີໂອທີ່ລະບຸວ່າເໝາະສຳລັບຜູ້ຊົມອາຍຸ 18 ປີຂຶ້ນໄປ ແລະ ວິດີໂອອື່ນໆທີ່ອາດບໍ່ເໝາະສົມສຳລັບຜູ້ຊົມທີ່ໃຊ້ປະສົບການແບບມີການເບິ່ງແຍງກວດກາ. ວິດີໂອປະກອບມີການຖ່າຍທອດສົດ, ວຼັອກ, ສອນການນໍາໃຊ້, ວິດີໂອການຫຼິ້ນເກມ, ວິດີໂອເພງ, ຂ່າວ, ວິດີໂອການສຶກສາ, DIY, ສິນລະປະ ແລະ ຫັດຖະກໍາ, ການເຕັ້ນ ແລະ ອື່ນໆອີກຫຼາຍຢ່າງ. ວິດີໂອບາງລາຍການຈະມີຫົວຂໍ້ທີ່ລະອຽດອ່ອນເຊິ່ງອາດເໝາະສົມສຳລັບໄວຮຸ່ນທີ່ໃຫຍ່ແລ້ວ ເຊັ່ນ: ພາບຄວາມຮຸນແຮງຈະແຈ້ງ, ເນື້ອຫາສຳລັບຜູ້ໃຫຍ່, ຮູບໂປ້ເປືອຍ, ຄຳຫຍາບຄາຍຢ່າງຈະແຈ້ງ ແລະ ຫົວຂໍ້ຕ່າງໆ ເຊັ່ນ: ໂຣກທາງຈິດ, ການຄວບຄຸມອາຫານ ແລະ ສຸຂະພາບທາງເພດ. ລູກຂອງທ່ານຈະເຫັນ ຄຳເຫັນ ໃນວິດີໂອ.
ກະລຸນາສຶກສາເພີ່ມເຕີມຢູ່ ການຕັ້ງຄ່າເນື້ອຫາສໍາລັບຄອບຄົວທີ່ໃຊ້ປະສົົບການທີ່ມີການເບິ່ງແຍງກວດກາ.
ຂ້ອຍສາມາດອະນຸຍາດໃຫ້ບັນຊີທີ່ມີການເບິ່ງແຍງກວດກາຂອງລູກຂ້ອຍເຂົ້າເຖິງ YouTube Music ຫຼື YouTube TV ບໍ່?
YouTube Music ຮອງຮັບບັນຊີທີ່ມີການເບິ່ງແຍງກວດກາ. ການຕັ້ງຄ່າເນື້ອຫາ ທີ່ທ່ານເລືອກສຳລັບບັນຊີທີ່ມີການເບິ່ງແຍງກວດກາຂອງລູກຂອງທ່ານຍັງຈະມີຜົນນຳໃຊ້ກັບເນື້ອຫາ YouTube Music ເມື່ອເຂົາເຈົ້າເຂົ້າສູ່ລະບົບແອັບ ຫຼື ເວັບໄຊ.
ຈະເກີດຫຍັງຂຶ້ນຫາກຂ້ອຍບໍ່ສາມາດດາວໂຫຼດ YouTube ຫຼື YouTube Music ຢູ່ອຸປະກອນ iOS ຂອງລູກຂ້ອຍໄດ້?
ເພື່ອດາວໂຫຼດແອັບ YouTube ຫຼື YouTube Music, ຜູ້ປົກຄອງຄວນກວດສອບ ການຕັ້ງຄ່າການຈຳກັດເນື້ອຫາ ແລະ ຄວາມເປັນສ່ວນຕົວ ຂອງເຂົາເຈົ້າໃນອຸປະກອນ iOS ຂອງລູກຂອງເຂົາເຈົ້າ.
ຫາກລູກຂອງຂ້ອຍມີບັນຊີທີ່ມີການເບິ່ງແຍງກວດກາ, ເຂົາເຈົ້າສາມາດໃຊ້ YouTube ຢູ່ໂທລະທັດຂອງຂ້ອຍໄດ້ບໍ?
ບັນຊີທີ່ມີການເບິ່ງແຍງກວດກາສາມາດໃຊ້ YouTube ໄດ້ຢູ່ ສະມາດທີວີສ່ວນໃຫຍ່ທີ່ມີສິດ, Microsoft Xbox, Nintendo Switch ແລະ Sony PlayStation. ອຸປະກອນ Android TV ຮຸ່ນເກົ່າບໍ່ຮອງຮັບບັນຊີທີ່ມີການເບິ່ງແຍງກວດກາ.
ຂ້ອຍຈະຕັ້ງຄ່າບັນຊີທີ່ມີການເບິ່ງແຍງກວດກາໂດຍໃຊ້ອຸປະກອນທີ່ເປີດການນຳໃຊ້ຜູ້ຊ່ວຍ Google ໄດ້ແນວໃດ?
ເພື່ອເພີ່ມລູກຂອງທ່ານ, ໃຫ້ປະຕິບັດຕາມຂັ້ນຕອນໃນ ໃຫ້ລູກຂອງທ່ານໃຊ້ຜູ້ຊ່ວຍ Google ຢູ່ອຸປະກອນຂອງທ່ານ. ຫາກທ່ານເພີ່ມບັນຊີ Google ແລະ ສຽງຂອງລູກຂອງທ່ານໃສ່ອຸປະກອນດັ່ງກ່າວ, ບັນຊີທີ່ມີການເບິ່ງແຍງກວດກາກໍສາມາດໃຊ້ຜູ້ຊ່ວຍ Google ຢູ່ອຸປະກອນທີ່ໃຊ້ຮ່ວມກັນໄດ້.
YouTube ກັ່ນຕອງເນື້ອຫາທີ່ບໍ່ເໝາະສົມອອກແນວໃດ?
ຂໍ້ແນະນຳຊຸມຊົນ ຂອງພວກເຮົາຈະກຳນົດ ສິ່ງທີ່ອະນຸຍາດ ແລະ ບໍ່ອະນຸຍາດຢູ່ YouTube. ຄໍາແນະນໍາເຫຼົ່ານີ້ມີຜົນນໍາໃຊ້ກັບທຸກຄົນ, ໂດຍບໍ່ກ່ຽວກັບອາຍຸຂອງເຂົາເຈົ້າ. ຖ້າທ່ານຕັ້ງບັນຊີທີ່ມີການເບິ່ງແຍງກວດກາສໍາລັບລູກຂອງທ່ານ, ມີນະໂຍບາຍຕ່າງໆເພື່ອກຳນົດວ່າເນື້ອຫາໃດເໝາະສົມສໍາລັບ ການຕັ້ງຄ່າເນື້ອຫາ ທີ່ແຕກຕ່າງກັນ.
ພວກເຮົາເປັນຫ່ວງຜູ້ໃຊ້ຂອງພວກເຮົາຫຼາຍ ແລະ ເຮັດວຽກຢ່າງໜັກເພື່ອນໍາອອກເນື້ອຫາທີ່ບໍ່ເໝາະສົມ, ແຕ່ວ່າບໍ່ມີລະບົບການກັ່ນຕອງອັດຕະໂນມັດໃດທີ່ສົມບູນ. ທ່ານສາມາດປ່ຽນການອະນຸຍາດແອັບ ແລະ ການຕັ້ງຄ່າເນື້ອຫາສໍາລັບລູກຂອງທ່ານໄດ້ຕະຫຼອດເວລາ. ຫາກທ່ານພົບບາງຢ່າງທີ່ທ່ານເຊື່ອວ່າບໍ່ເໝາະສົມສໍາລັບ YouTube, ທ່ານສາມາດ ລາຍງານ ໄດ້.
ໂຄສະນາເຮັດວຽກກັບບັນຊີທີ່ມີການເບິ່ງແຍງກວດກາແນວໃດ?
ເພື່ອປົກປ້ອງເດັກນ້ອຍໃຫ້ໄດ້ດີຍິ່ງຂຶ້ນ, ພວກເຮົາຫ້າມບໍ່ໃຫ້ສະແດງ ໂຄສະນາໃນບາງໝວດໝູ່ ແລະ ໄດ້ປິດໂຄສະນາທີ່ປັບແຕ່ງສ່ວນຕົວ. ຜູ້ຊົມເນື້ອຫາທີ່ "ສ້າງມາສຳລັບເດັກນ້ອຍ" ອາດເຫັນໂຄສະນາກ່ອນ ແລະ ຫຼັງວິດີໂອຈະຖືກຫຼິ້ນ. ສິ່ງນີ້ຈະຊ່ວຍແຈ້ງເຕືອນເຂົາເຈົ້າວ່າການໂຄສະນາຈະເລີ່ມຕົ້ນ ແລະ ສິ້ນສຸດເມື່ອໃດ. ຫາກທ່ານມີ ແພັກເກດຄອບຄົວ YouTube Premium, ລູກຂອງທ່ານມີສິດເບິ່ງເນື້ອຫາແບບບໍ່ມີໂຄສະນາ ແລະ ສິດທິປະໂຫຍດອື່ນໆທີ່ໄດ້ຮັບຮ່ວມກັນຈາກການເປັນສະມາຊິກ.
ວິດີໂອທີ່ຜູ້ສ້າງແຈ້ງໃຫ້ພວກເຮົາຊາບວ່າມີການສະແດງຜະລິດຕະພັນແບບເສຍເງິນ ຫຼື ການສະໜັບສະໜຸນໃນວິດີໂອຂອງເຂົາເຈົ້າຈະປາກົດໃນບັນຊີທີ່ມີການເບິ່ງແຍງກວດກາຢູ່ YouTube. ນອກຈາກນັ້ນ, ວິດີໂອເຫຼົ່ານີ້ຍັງຈະຕ້ອງປະຕິບັດຕາມ ນະໂຍບາຍໂຄສະນາ ຢູ່ວິດີໂອທີ່ສ້າງມາສຳລັບເດັກນ້ອຍນຳ.
YouTube ເປັນສ່ວນໜຶ່ງຂອງ Google ແລະ ປະຕິບັດຕາມ ນະໂຍບາຍຄວາມເປັນສ່ວນຕົວ ແລະ ຫຼັກການ ຂອງ Google. ພວກເຮົາຮູ້ວ່າທ່ານຈຳເປັນຕ້ອງເຂົ້າໃຈວ່າພວກເຮົາຮວບຮວມຂໍ້ມູນສ່ວນຕົວໃດແດ່ຈາກບັນຊີ Google ຂອງລູກຂອງທ່ານ. ນອກຈາກນີ້, ພວກເຮົາຍັງຮູ້ວ່າທ່ານຈຳເປັນຕ້ອງໄດ້ຮູ້ເຫດຜົນທີ່ພວກເຮົາຮວບຮວມຂໍ້ມູນດັ່ງກ່າວ, ພ້ອມທັງວິທີທີ່ທ່ານສາມາດຄວບຄຸມ ແລະ ລຶບຂໍ້ມູນດັ່ງກ່າວ. ນະໂຍບາຍຄວາມເປັນສ່ວນຕົວຂອງ Google ແລະ ປະກາດຄວາມເປັນສ່ວນຕົວ ຂອງພວກເຮົາສຳລັບບັນຊີ Google ຂອງເດັກນ້ອຍອາຍຸຕ່ຳກວ່າ 13 ປີ (ຫຼື ອາຍຸຕາມຫຼັກເກນໃນປະເທດ/ພາກພື້ນຂອງເຂົາເຈົ້າ) ອະທິບາຍຂໍ້ປະຕິບັດກ່ຽວກັບນະໂຍບາຍຄວາມເປັນສ່ວນຕົວຂອງພວກເຮົາ.
ລູກຂອງທ່ານສາມາດຈັດການ ແລະ ສຶກສາເພີ່ມເຕີມກ່ຽວກັບການຕັ້ງຄ່າ ແລະ ການຄວບຄຸມຄວາມເປັນສ່ວນຕົວຢູ່ YouTube ຂອງເຂົາເຈົ້າໄດ້ໃນ "ຂໍ້ມູນຂອງທ່ານໃນ YouTube" ໃນບັນຊີຂອງເຂົາເຈົ້າ. ໜ້ານີ້ຈະມີສະຫຼຸບກ່ຽວກັບຂໍ້ມູນວິດີໂອ ແລະ ກິດຈະກຳຂອງເຂົາເຈົ້າ ຮວມທັງການຕັ້ງຄ່າເພື່ອຈັດການຂໍ້ມູນນີ້. ນອກຈາກນັ້ນ, ໜ້າດັ່ງກ່າວຍັງມີລາຍລະອຽດຂໍ້ມູນກ່ຽວກັບວິທີທີ່ຂໍ້ມູນຂອງເຂົາເຈົ້າຖືກນຳໃຊ້ເພື່ອປັບປຸງປະສົບການນຳໃຊ້ YouTube ຂອງເຂົາເຈົ້າ, ເຊັ່ນ: ການແຈ້ງເຕືອນສິ່ງທີ່ເຂົາເຈົ້າເຄີຍເບິ່ງ ແລະ ນຳສະເໜີວິດີໂອແນະນຳ.
ໃນຖານະຜູ້ຈັດການທີ່ເປັນຜູ້ປົກຄອງຂອງບັນຊີ Google ຂອງລູກທ່ານ, ທ່ານສາມາດຢຸດຊົ່ວຄາວ ຫຼື ລຶບລ້າງປະຫວັດການຊອກຫາ ແລະ ປະຫວັດການເບິ່ງຂອງເຂົາເຈົ້າຈາກ Family Link ໄດ້. ນອກຈາກນີ້, ທ່ານຍັງສາມາດລຶບລ້າງປະຫວັດຈາກໜ້າ ການຕັ້ງຄ່າຂອງຜູ້ປົກຄອງ ຂອງທ່ານໃນ YouTube ໄດ້ນຳ.
ໂຮງຮຽນ ຫຼື ອົງກອນດ້ານການສຶກສາສາມາດໃຊ້ບັນຊີທີ່ມີການເບິ່ງແຍງກວດກາໄດ້ບໍ?
ຜູ້ໃດມີສິດສຳລັບບັນຊີທີ່ມີການເບິ່ງແຍງກວດກາຢູ່ YouTube?
ທ່ານສາມາດຕັ້ງຄ່າບັນຊີທີ່ມີການເບິ່ງແຍງກວດກາຢູ່ YouTube ສຳລັບລູກທ່ານທີ່ມີອາຍຸຕໍ່າກວ່າ 13 ປີ (ຫຼື ອາຍຸທີ່ກ່ຽວຂ້ອງຢູ່ປະເທດ/ພາກພື້ນຂອງເຂົາເຈົ້າ).
ທ່ານບໍ່ມີສິດສຳລັບບັນຊີທີ່ມີການເບິ່ງແຍງກວດກາຢູ່ YouTube ຖ້າ:
- ລູກຂອງທ່ານມີອາຍຸ 13 ປີຂຶ້ນໄປ (ຫຼື ອາຍຸຕາມຫຼັກເກນໃນປະເທດ/ພາກພື້ນຂອງເຂົາເຈົ້າ). ຂໍ້ກຳນົດນີ້ຈະມີຜົນສະເພາະໃນກໍລະນີທີ່ທ່ານໄດ້ສ້າງ ບັນຊີທີ່ມີການເບິ່ງແຍງກວດກາ ໃຫ້ລູກຂອງທ່ານກ່ອນທີ່ເຂົາເຈົ້າຈະມີອາຍຸຕາມຫຼັກເກນໃນປະເທດ/ພາກພື້ນຂອງເຂົາເຈົ້າ.
- ທ່ານອາໄສຢູ່ໃນສະຫະພາບຢູໂຣບ ແລະ ທ່ານໄດ້ຕັ້ງຄ່າການເບິ່ງແຍງກວດກາໃຫ້ລູກຂອງທ່ານກ່ອນເດືອນເມສາ 2021. ຫາກລູກຂອງທ່ານມີອາຍຸຕ່ຳກວ່າ ອາຍຸຕາມຫຼັກເກນໃນປະເທດ/ພາກພື້ນຂອງເຂົາເຈົ້າ ໃນເວລາດັ່ງກ່າວ, ບັນຊີທີ່ມີການເບິ່ງແຍງກວດກາກໍຈະໃຊ້ບໍ່ໄດ້ເຊັ່ນກັນ.
ລູກຂອງຂ້ອຍສາມາດອ່ານ ແລະ ຂຽນຄຳເຫັນໃນວິດີໂອໄດ້ຫຼືບໍ່?
ເດັກນ້ອຍທີ່ມີ ການຕັ້ງຄ່າແບບເນື້ອຫາສ່ວນໃຫຍ່ຂອງ YouTube ຫຼື ແບບສຳຫຼວດເພີ່ມເຕີມ ຈະສາມາດອ່ານຄຳເຫັນໃນວິດີໂອ YouTube ໄດ້ ແຕ່ຈະບໍ່ສາມາດຂຽນຄຳເຫັນຂອງຕົນເອງໄດ້.
ວິທີທີ່ຄຳເຫັນໃນວິດີໂອເຮັດວຽກຮ່ວມກັບບັນຊີທີ່ມີການເບິ່ງແຍງກວດກາຂອງລູກຂອງທ່ານ
ສຶກສາເພີ່ມເຕີມກ່ຽວກັບຄຳເຫັນແບບອ່ານເທົ່ານັ້ນສຳລັບລູກຂອງທ່ານ.