ກວດເບິ່ງວ່າເນື້ອຫາຂອງທ່ານ "ຖືກສ້າງມາສໍາລັບເດັກນ້ອຍ" ຫຼືບໍ່

ບໍ່ວ່າທ່ານຈະຢູ່ບ່ອນໃດ, ພວກເຮົາຕ້ອງການໃຫ້ທ່ານບອກພວກເຮົາວ່າວິດີໂອຂອງທ່ານຖືກສ້າງມາສຳລັບເດັກນ້ອຍຫຼືບໍ່ ຕາມຂໍ້ຕົກລົງກັບຄະນະກຳມາທິການການຄ້າແຫ່ງສະຫະພັນທະລັດຂອງສະຫະລັດ (FTC) ແລະ ເພື່ອຊ່ວຍໃຫ້ທ່ານປະຕິບັດຕາມ ກົດໝາຍການປົກປ້ອງຄວາມເປັນສ່ວນຕົວອອນລາຍຂອງເດັກນ້ອຍ (COPPA) ແລະ/ຫຼື ກົດໝາຍອື່ນໆທີ່ກ່ຽວຂ້ອງ. ຫາກບໍ່ສາມາດຕັ້ງຄ່າເນື້ອຫາຂອງທ່ານໃຫ້ເໝາະສົມໄດ້ ອາດເຮັດໃຫ້ມີຜົນຕາມມາຢູ່ YouTube ຫຼື ມີຜົນທາງກົດໝາຍຕິດຕາມມາຫຼາຍຢ່າງພາຍໃຕ້ກົດໝາຍ COPPA ແລະ ກົດໝາຍອື່ນໆ.

ພວກເຮົາໃຫ້ຄໍາແນະນໍາບາງຢ່າງຕໍ່ກັບສິ່ງທີ່ຖືວ່າ “ສ້າງມາສໍາລັບເດັກນ້ອຍ” ທາງລຸ່ມນີ້, ແຕ່ພວກເຮົາບໍ່ສາມາດໃຫ້ຄໍາແນະນໍາດ້ານກົດໝາຍໄດ້. ຫາກທ່ານບໍ່ແນ່ໃຈວ່າວິດີໂອຂອງທ່ານເປັນໄປຕາມມາດຕະຖານນີ້ຫຼືບໍ່, ພວກເຮົາແນະນໍາໃຫ້ທ່ານຊອກຫາທີ່ປຶກສາທາງກົດໝາຍ.

ໝາຍເຫດ: ໃນເດືອນພະຈິກ 2019, FTC ໄດ້ເປີດເຜີຍຂໍ້ມູນເພີ່ມເຕີມເພື່ອຊ່ວຍຜູ້ສ້າງ YouTube ຕັດສິນໃຈວ່າເນື້ອຫາຂອງເຂົາເຈົ້າ “ສ້າງມາສໍາລັບເດັກນ້ອຍ” ຫຼືບໍ່. ທ່ານສາມາດສຶກສາເພີ່ມເຕີມໄດ້ຢູ່ ບລັອກຂອງ FTC.

ສ້າງມາສຳລັບເດັກນ້ອຍ	ບໍ່ໄດ້ສ້າງມາສຳລັບເດັກນ້ອຍ
ຕົວຢ່າງສິ່ງທີ່ອາດຖືວ່າສ້າງມາເພື່ອເດັກນ້ອຍຮວມມີ: ເດັກນ້ອຍເປັນຜູ້ຊົມຫຼັກຂອງວິດີໂອ. ເດັກນ້ອຍບໍ່ແມ່ນຜູ້ຊົມຫຼັກ, ແຕ່ວິດີໂອຍັງຄົງເນັ້ນໄປໃສ່ເດັກນ້ອຍເນື່ອງຈາກມັນມີນັກສະແດງ, ຕົວລະຄອນ, ກິດຈະກຳ, ເກມ, ເພງ, ເລື່ອງລາວ ຫຼື ເນື້ອຫາອື່ນທີ່ສະທ້ອນເຖິງຄວາມຕັ້ງໃຈໃນການກໍານົດເປົ້າໝາຍໄປທີ່ເດັກນ້ອຍ. ເບິ່ງຄໍາແນະນໍາເພີ່ມເຕີມໄດ້ຢູ່ ທາງລຸ່ມ.	ຕົວຢ່າງສິ່ງທີ່ອາດຖືວ່າບໍ່ໄດ້ສ້າງມາເພື່ອເດັກນ້ອຍຮວມມີ: ເນື້ອຫາທີ່ມີຮູບແບບທາງເພດ, ຄວາມຮຸນແຮງ, ລາມົກ ຫຼື ຮູບແບບອື່ນສໍາລັບຜູ້ໃຫຍ່ທີ່ບໍ່ເໝາະກັບຜູ້ຊົມໄວໝຸ່ມ. ວິດີໂອທີ່ຖືກຈໍາກັດອາຍຸທີ່ບໍ່ເໝາະສົມສໍາລັບຜູ້ຊົມອາຍຸຕໍ່າກວ່າ 18 ປີ. ເບິ່ງຄໍາແນະນໍາເພີ່ມເຕີມ ດ້ານລຸ່ມ.

 

ຂ້ອຍຈະຮູ້ໄດ້ແນວໃດວ່າຂ້ອຍຄວນຕັ້ງຄ່າເນື້ອຫາຂອງຂ້ອຍເປັນສ້າງມາເພື່ອເດັກນ້ອຍຫຼືບໍ່?

ຫາກວິດີໂອຂອງທ່ານມີນັກສະແດງ, ຕົວລະຄອນ, ກິດຈະກຳ, ເກມ, ເພງ, ເລື່ອງລາວ ຫຼື ເນື້ອຫາອື່ນທີ່ສະທ້ອນເຖິງຄວາມຕັ້ງໃຈໃນການກໍານົດເປົ້າໝາຍໄປທີ່ເດັກນ້ອຍ, ມັນມີແນວໂນ້ມວ່າຈະເປັນວິດີໂອທີ່ສ້າງມາສໍາລັບເດັກນ້ອຍ. ອີງຕາມ ຂໍ້ແນະນຳຂອງ FTC ກ່ຽວກັບ COPPA, ວິດີໂອໃດໜຶ່ງຈະຖືວ່າເປັນວິດີໂອທີ່ກໍາກັບສໍາລັບເດັກນ້ອຍ (ເຊິ່ງພວກເຮົາເອີ້ນວ່າ “ສ້າງມາສໍາລັບເດັກນ້ອຍ”) ກໍຕໍ່ເມື່ອ:

• ເດັກນ້ອຍເປັນຜູ້ຊົມຫຼັກຂອງວິດີໂອໂດຍອ້າງອີງຈາກປັດໄຈທີ່ອະທິບາຍໄວ້ດ້ານລຸ່ມນີ້. 
• ເດັກນ້ອຍບໍ່ແມ່ນຜູ້ຊົມຫຼັກ, ແຕ່ວິດີໂອຍັງຄົງເນັ້ນໄປໃສ່ເດັກນ້ອຍໂດຍອ້າງອີງຈາກປັດໄຈທາງລຸ່ມນີ້. (ເນື້ອຫານີ້ຖືກເອີ້ນເປັນເນື້ອຫາ “ຜູ້ຊົມປະສົມ” ພາຍໃຕ້ COPPA, ເຊິ່ງເປັນປະເພດໜຶ່ງຂອງເນື້ອຫາທີ່ກໍາກັບສໍາລັບເດັກນ້ອຍ. ເນື້ອຫາສໍາລັບຜູ້ຊົມທົ່ວໄປຈະບໍ່ຄືກັນກັບຜູ້ຊົມປະສົມ.)

ຫາກຈະຕັດສິນໃຈວ່າຊ່ອງ ຫຼື ວິດີໂອຂອງທ່ານສ້າງມາສໍາລັບເດັກນ້ອຍຫຼືບໍ່, ທ່ານຄວນພິຈາລະນາປັດໄຈຕ່າງໆ, ຮວມມີ:

• ຫົວຂໍ້ຂອງວິດີໂອ (ຕົວຢ່າງ: ເນື້ອຫາການສຶກສາສຳລັບນັກຮຽນອະນຸບານ).
• ບໍ່ວ່າເດັກນ້ອຍຈະເປັນຜູ້ຊົມທີ່ທ່ານຕັ້ງໃຈໄວ້ (ຕົວຢ່າງ: ຕາມທີ່ລະບຸໄວ້ໃນເມຕາເດຕາວິດີໂອຂອງທ່ານ) ຫຼື ເປັນຜູ້ຊົມຕົວຈິງຂອງວິດີໂອ.
• ວິດີໂອມີນັກສະແດງ ຫຼື ໂມເດວທີ່ເປັນເດັກນ້ອຍຫຼືບໍ່.
• ວິດີໂອມີຕົວລະຄອນ, ຄົນດັງ ຫຼື ເຄື່ອງຫຼິ້ນທີ່ດຶງດູດຄວາມສົນໃຈຂອງເດັກນ້ອຍ, ຮວມທັງ ຕົວລະຄອນອະນິເມຊັນ ຫຼື ຮູບຮ່າງກາຕູນຫຼືບໍ່.
• ພາສາຂອງວິດີໂອມີເຈດຕະນາໃຫ້ເດັກນ້ອຍເຂົ້າໃຈຫຼືບໍ່.
• ວິດີໂອຮວມມີກິດຈະກໍາທີ່ດຶງດູດຄວາມສົນໃຈຂອງເດັກນ້ອຍຫຼືບໍ່, ເຊັ່ນ: ການສະແດງລະຄອນ, ເພງ ຫຼື ເກມງ່າຍໆ ຫຼື ການສຶກສາປະຖົມໄວ.
• ວິດີໂອມີເພງ, ເລື່ອງລາວ ຫຼື ກາບກອນສໍາລັບເດັກນ້ອຍຫຼືບໍ່.
• ຂໍ້ມູນອື່ນໆທີ່ທ່ານອາດຕ້ອງໃຊ້ເພື່ອຊ່ວຍລະບຸຜູ້ຊົມຂອງວິດີໂອທ່ານ, ເຊັ່ນ: ຫຼັກຖານທີ່ຈະແຈ້ງຂອງຜູ້ຊົມວິດີໂອ.
• ເນື້ອຫາມີການໂຄສະນາໃຫ້ກັບເດັກນ້ອຍຫຼືບໍ່. 

ໝາຍເຫດ:

• ການທີ່ເນື້ອຫາຂອງທ່ານອາດມີບາງປັດໄຈໃນປັດໄຈເຫຼົ່ານີ້ບໍ່ໄດ້ໝາຍຄວາມວ່າມັນສ້າງມາສໍາລັບເດັກນ້ອຍໂດຍອັດຕະໂນມັດ. ທ່ານຄວນພິຈາລະນາໃຫ້ດີວ່າທ່ານກໍາລັງພະຍາຍາມເຂົ້າຫາໃຜດ້ວຍວິດີໂອຂອງທ່ານໃນເວລາທີ່ປະເມີນເນື້ອຫາຂອງທ່ານ ແລະ ປັດໄຈຕ່າງໆທາງເທິງ.
• YouTube Analytics (YTA) ບໍ່ໄດ້ຖືກອອກແບບມາເພື່ອຊ່ວຍໃນການລະບຸວ່າເນື້ອຫາຂອງທ່ານແມ່ນກຳກັບສຳລັບເດັກນ້ອຍຫຼືບໍ່. ທ່ານຄວນໃຊ້ປັດໄຈຕ່າງໆທີ່ FTC ລະບຸໄວ້ຂ້າງເທິງຕັ້ງຄ່າຜູ້ຊົມຂອງທ່ານ.
• ວິດີໂອທີ່ທ່ານຕັ້ງຄ່າເປັນ “ສ້າງມາສໍາລັບເດັກນ້ອຍ” ແມ່ນມີໂອກາດຖືກແນະນໍາພ້ອມກັບວິດີໂອອື່ນໆຂອງເດັກນ້ອຍ. ກວດເບິ່ງ ຄຳຖາມທີ່ຖືກຖາມເລື້ອຍໆ ຂອງພວກເຮົາກ່ຽວກັບເນື້ອຫາທີ່ສ້າງມາສໍາລັບເດັກນ້ອຍ.  

ສໍາຄັນ: ໃນຖານະຜູ້ສ້າງ, ທ່ານຮູ້ວິດີໂອຂອງທ່ານ ແລະ ຜູ້ຊົມຂອງທ່ານດີທີ່ສຸດ ແລະ ມັນແມ່ນຄວາມຮັບຜິດຊອບທາງກົດໝາຍຂອງທ່ານທີ່ຕ້ອງປະຕິບັດຕາມ COPPA ແລະ/ຫຼື ກົດໝາຍອື່ນໆທີ່ກ່ຽວຂ້ອງ ແລະ ກໍານົດເນື້ອຫາຂອງທ່ານຢ່າງຖືກຕ້ອງ. ຢ່າອາໄສໃສ່ລະບົບຂອງພວກເຮົາໃນການຕັ້ງຄ່າຜູ້ຊົມຂອງທ່ານເນື່ອງຈາກລະບົບຂອງພວກເຮົາອາດບໍ່ລະບຸເນື້ອຫາທີ່ FTC ຫຼື ໜ່ວຍງານອື່ນພິຈາລະນາວ່າສ້າງມາສໍາລັບເດັກນ້ອຍ. ຫາກທ່ານຈັດໝວດໝູ່ເນື້ອຫາຂອງທ່ານບໍ່ຖືກຕ້ອງ, ມັນອາດມີຜົນຕາມມາຢູ່ YouTube ແລະ ຜົນທາງກົດໝາຍຕິດຕາມມາຫຼາຍຢ່າງພາຍໃຕ້ກົດໝາຍການປົກປ້ອງຄວາມເປັນສ່ວນຕົວອອນລາຍຂອງເດັກນ້ອຍ (COPPA) ຫຼື ກົດໝາຍທ້ອງຖິ່ນອື່ນໆທີ່ກ່ຽວຂ້ອງ. 

ຂ້ອຍຈະຮູ້ໄດ້ແນວໃດວ່າຂ້ອຍຄວນຕັ້ງຄ່າເນື້ອຫາຂອງຂ້ອຍວ່າບໍ່ໄດ້ສ້າງມາເພື່ອເດັກນ້ອຍຫຼືບໍ່?

ພິຈາລະນາໃຫ້ດີວ່າທ່ານກໍາລັງພະຍາຍາມເຂົ້າຫາໃຜດ້ວຍວິດີໂອຂອງທ່ານໃນເວລາທີ່ປະເມີນເນື້ອຫາຂອງທ່ານ. ຕົວຢ່າງ: ວິດີໂອບໍ່ຈໍາເປັນສ້າງມາສໍາລັບເດັກນ້ອຍພຽງເພາະວ່າ:

• ມັນປອດໄພ ຫຼື ເໝາະສົມສໍາລັບທຸກຄົນໃນການເບິ່ງ (ເອີ້ນອີກຢ່າງວ່າ “ເປັນມິດຕໍ່ຄອບຄົວ”).
• ມັນກວມເອົາກິດຈະກໍາທີ່ກ່ຽວຂ້ອງກັບເດັກນ້ອຍມາແຕ່ດັ້ງເດີມ.
• ເດັກນ້ອຍອາດເຫັນມັນໂດຍບັງເອີນ. 

ເນື້ອຫາຜູ້ຊົມທົ່ວໄປ

ເນື້ອຫາຜູ້ຊົມທົ່ວໄປແມ່ນເນື້ອຫາທີ່ສາມາດດຶງດູດທຸກຄົນໄດ້, ແຕ່ບໍ່ໄດ້ມີຈຸດປະສົງເພື່ອເດັກນ້ອຍໂດຍສະເພາະ ຫຼື ເນື້ອຫາທີ່ມີໄວ້ໃຫ້ໄວຮຸ່ນ ຫຼື ຜູ້ຊົມທີ່ມີອາຍຸຫຼາຍກວ່າ. ເນື້ອຫາຜູ້ຊົມທົ່ວໄປຄວນຖືກຕັ້ງຄ່າເປັນ “ບໍ່ໄດ້ສ້າງມາສໍາລັບເດັກນ້ອຍ.”

ຕໍ່ໄປນີ້ແມ່ນຕົວຢ່າງຈໍານວນໜຶ່ງຂອງປະເພດວິດີໂອທີ່ອາດຖືເປັນສໍາລັບ “ຜູ້ຊົມທົ່ວໄປ”, ໃນກໍລະນີທີ່ບໍ່ມີຂໍ້ມູນທີ່ບົ່ງບອກເຖິງຈຸດປະສົງວ່າກຸ່ມເປົ້າໝາຍແມ່ນເດັກນ້ອຍ:  

• ວິດີໂອ DIY ທີ່ສອນຜູ້ທີ່ມັກວຽກໃນຍາມຫວ່າງກ່ຽວກັບວິທີການເຮັດຕຸກກະຕາ ຫຼື ຮູບປັ້ນດິນເຜົາ
• ວຼັອກຄອບຄົວທີ່ບອກພໍ່ແມ່ຜູ້ອື່ນໆກ່ຽວກັບການໄປຫຼິ້ນສວນສະໜຸກ 
• ວິດີໂອທີ່ມີຄໍາແນະນໍາລະອຽດກ່ຽວກັບການສ້າງ mod ຫຼື ຮູບແທນຕົວ
• ເນື້ອຫາການຕູນພາບເຄື່ອນໄຫວທີ່ດຶງດູດທຸກຄົນ
• ວິດີໂອການຫຼິ້ນເກມທີ່ມີເລື່ອງຕະຫຼົກຜູ້ໃຫຍ່

ຜູ້ຊົມທົ່ວໄປ ແລະ ຜູ້ຊົມປະສົມມີຄວາມແຕກຕ່າງກັນຄືແນວໃດ?

ໃນທາງກົງກັນຂ້າມ, ເນື້ອຫາຜູ້ຊົມປະສົມແມ່ນຖືວ່າເປັນປະເພດເນື້ອຫາທີ່ສ້າງມາສໍາລັບເດັກນ້ອຍ. ນີ້ແມ່ນເນື້ອຫາທີ່ມີເດັກນ້ອຍເປັນເປົ້າໝາຍໜຶ່ງໃນຜູ້ຊົມຂອງເຂົາເຈົ້າ, ເຖິງວ່າຈະບໍ່ແມ່ນຜູ້ຊົມຕົ້ນຕໍ ຫຼື ຜູ້ຊົມຫຼັກ ແລະ ມີຄຸນສົມບັດເປັນກໍາກັບສໍາລັບເດັກນ້ອຍຫຼັງຈາກການປັບສົມດຸນປັດໄຈທີ່ລະບຸໄວ້ທາງເທິງ.
 
ໝາຍເຫດ: ເນື້ອຫາທີ່ມີຮູບແບບທາງເພດ, ຄວາມຮຸນແຮງ, ລາມົກ ຫຼື ຮູບແບບສີສັນອື່ນສໍາລັບຜູ້ໃຫຍ່ທີ່ບໍ່ເໝາະກັບຜູ້ຊົມໄວໝຸ່ມບໍ່ຖືວ່າສ້າງມາສໍາລັບເດັກນ້ອຍ.

ເດັກນ້ອຍຕ້ອງມີອາຍຸເທົ່າໃດ?

ອາຍຸຂອງ "ເດັກນ້ອຍ" ໃນສະຫະລັດໝາຍເຖິງຜູ້ທີ່ມີອາຍຸຕໍ່າກວ່າ 13 ປີ. ຢ່າງໃດກໍຕາມ, ອາຍຸຂອງເດັກນ້ອຍອາດມີຄວາມແຕກຕ່າງກັນໃນປະເທດອື່ນໆ, ສະນັ້ນໃຫ້ພິຈາລະນາພາລະຜູກພັນເພີ່ມເຕີມທີ່ທ່ານອາດມີພາຍໃຕ້ກົດໝາຍທີ່ກ່ຽວຂ້ອງໃນເວລາທີ່ທ່ານປະເມີນວ່າເນື້ອຫາແມ່ນ “ສ້າງມາສໍາລັບເດັກນ້ອຍ” ຫຼືບໍ່ ແລະ ໃຫ້ປຶກສາກັບທີ່ປຶກສາທາງກົດໝາຍຫາກທ່ານມີຄໍາຖາມເພີ່ມເຕີມ.