Publizitatearen diru-sarrerei buruzko estatistikak ulertu

YouTube-ren diru-sarrerak eta kanalaren errendimendua egiazta ditzakezu neurketekin YouTube Analytics-en. Neurketa batzuek antzekoak dirudite, baina haien arteko desberdintasunak garrantzitsuak dira YouTube-ko publizitatearen diru-sarrerak ulertzeko.

Mila ikustaldiko diru-sarrerak

RPMak 1.000 bideo-ikustaldiko zenbat diru irabazi duzun adierazten duten neurketa bat dira. RPMak diru-sarreren hainbat iturburutan oinarritzen dira, hauek barne: iragarkiak, kanaleko kidetzak, YouTube Premium-eko diru-sarrerak, Super Chat-eko mezuak eta Super Stickers-eko eranskailuak.

1.000 ikustaldi inplikaziodun hartzen dira aintzat mila ikustaldiko diru-sarrerak kalkulatzeko.

Zergatik dira mila ikustaldiko diru-sarrerak mila agerpeneko kostua baino txikiagoak?

RPMak CPMa baino txikiagoak dira, arrazoi hauengatik:

• Mila ikustaldiko diru-sarrerak YouTube-ren diru-sarreren banaketaren ostean kalkulatzen direlako.
• RPMek ikustaldi guztiak barne hartzen dituztelako, dirua irabazteko aukera gaituta ez zeukaten ikustaldiak barne.

Lortzen dituzun diru-sarrerak ez dira aldatu RPM neurketa gehitzean.

Zer alde dago RPMak eta CPMaren artean?

CPMa 1.000 iragarki-agerpeneko kostua da YouTube-ren diru-sarreren zatia kendu aurretik. RPMak 1.000 ikustaldiko guztizko diru-sarrerak dira (YouTube-ren diru-sarreren zatia kendu ondoren).

Mila ikustaldiko diru-sarrerak

CPMa

Sortzaileetan oinarritutako neurketa. YouTube Analytics-en adierazten diren guztizko diru-sarrerak hartzen ditu barne; hala nola iragarkiak, YouTube Premium, kanaleko kidetzak, Super Chat eta Super Stickers. Film laburren kasuan, ikustaldi inplikaziodun guztiak hartzen dira aintzat. Bideoen kasuan, ikustaldi guztiak hartzen dira aintzat. Diru-sarrerak banatu ondoren benetan lortutako diru-sarrerak.

Iragarleetan oinarritutako neurketa. Iragarkien eta YouTube Premium-en bidez lortutako diru-sarrerak soilik hartzen ditu barne. Dirua irabazteko aukera gaituta daukaten (hau da, iragarkiak erakusten dituzten) bideoetako ikustaldiak soilik hartzen ditu barne. Diru-sarrerak zatitu aurretik irabazitakoa.

Zergatik dira garrantzitsuak RPMak?

Dirua irabazteko aukeraren eraginkortasuna nolakoa den hobeto ulertzen laguntzen dizu.

Nola handitu ditzaket RPMak?

RPMak hobetzeko, guztizko diru-sarrerak hobetu behar dituzu. Hona hemen RPMak maximizatzeko urrats batzuk:

• Aktibatu dirua irabazteko aukera bideo guztietan.
• Aktibatu tarteko iragarkiak.
• Aktibatu dirua irabazteko aukeraren ordezko eginbideak (hala nola kidetzak eta Super Chat) diru-sarreren iturburuak dibertsifikatzeko.

Kontuan izan eginbide bakoitzak bere baldintza eta gidalerroak dituela.

Zer esan nahi du RPMak handitzeak edo txikitzeak?

RPMak YouTube-n dirua irabazteko duzun erritmoaren laburpena dira. Gora egiten badute, 1.000 ikustaldiko diru gehiago irabazten ari zarela esan nahi du, eta behera egiten badute, berriz, gutxiago irabazten ari zarela. Kontuan hartu RPMek agian behera egingo dutela dirua irabazteko aukera gaituta ez dauzkaten ikustaldiak handitzen direnean, diru-sarrerak bere horretan geratu arren.

RPMek gora ala behera egitea diru-sarrerak lortzeko duzun estrategian zerk funtzionatzen duen eta zerk ez ikusteko adierazle on bat da. Mila ikustaldiko diru-sarrerei zerk eragiten dieten ulertzea dirua irabazteko estrategia hobetzeko aukerak identifikatzen lagunduko dizu.

Zer ez dute adierazten RPMek nire diru-sarrerei buruz?

RPMak dirua irabazteko aukeraren neurketa erabilgarri bat dira sortzaileentzat, baina ez dute adierazten diru-sarreren historia osoa. Neurketak ez ditu barne hartzen:

• salgaiak saltzeagatik edo salgaien apala erabilita lortutako diru-sarrerak
• markekin egindako tratuei eta bideo babestuei esker (YouTube-ren Sortzaile eta markaren arteko bazkidetzak programarekin izan ezik) lortutako diru-sarrerak
• YouTube-ren bidez zeharka sortutako bestelako diru-sarrerak (zerbitzuak, mintzaldiak, aholkularitzagatiko komisioak, etab.)

Mila ikustaldiko diru-sarrerek ez dute azaltzen diru-sarreren iturburuetako zein den guztizko diru-sarreren aldaketen eragilea.

RPMek hainbat neurketa konbinatzen dituztenez, ezin dute azaldu diru-sarreren iturburuetako zein den guztizko diru-sarreren aldaketen eragilea.

Adibidez, baliteke RPMak murriztea ikustaldiek gora egin dutelako, baina guztiak ez dira iragarkiak gaituta dauzkaten ikustaldiak. Horrez gain, baliteke RPMak handitzea ikustaldietan aldaketa handirik ikusi gabe, ikusleak kanaleko kidetzetan erregistratzen ari direlako.

RPMen aldaketak guztiz ulertzeko, YouTube-k eskaintzen dituen estatistika guztiak erabiltzea gomendatzen dizugu.

CPMa

CPMa YouTube-n iragarkiak erakusteko iragarleek zenbat diru gastatzen duten adierazten duen neurketa bat da. CPMaren neurketa desberdin batzuk ikusiko dituzu YouTube Analytics-en:

• CPMa: iragarle batek 1.000 iragarki-agerpeneko ordaintzen duen zenbatekoa. Iragarki-agerpen bakoitza iragarki bat bistaratzen denean zenbatzen da.
• Erreprodukzioetan oinarritutako mila agerpeneko kostua: iragarki bat erakusten duen bideo batean iragarleak ordaintzen duena 1.000 erreprodukzioko.

Zertan desberdintzen dira CPMa eta erreprodukzioetan oinarritutako mila agerpeneko kostua?

YouTube-ko bideoek iragarki bat baino gehiago eduki ditzakete. CPMak iragarki-agerpenengatik iragarleak ordaintzen duena adierazten du. Erreprodukzioetan oinarritutako mila agerpeneko kostuak iragarki bat edo gehiago duen bideoa erreproduzitzean iragarleak ordaintzen duena adierazten du. Erreprodukzioetan oinarritutako mila agerpeneko kostua askotan mila agerpeneko kostua baino handiagoa da.

Adibidez, demagun zure bideoa 5.000 aldiz ikusi dela. 1.000 ikustaldik iragarki bat zuten, eta 500 ikustaldik bi iragarki. Guztira, 1.500 ikustaldi iragarkiekin. Kasu honetan, 2.000 iragarki-agerpen egon direla esan nahi du, baina dirua irabazteko aukera ematen duten 1.500 erreprodukzio soilik.

Demagun iragarleak 7 dolar ordaindu dituela guztira. Bideoaren agerpen bakoitzeko kostua honakoa izango litzateke: iragarleak agerpeneko ordaindu beharreko 7 dolar zati 2.000 iragarki-agerpen, hau da, 0,0035 dolar. CPMa 0,0035 dolar bider 1.000 izango litzateke, hau da, 3,50 dolar. Erreprodukzioetan oinarritutako mila agerpeneko kostua honakoa izango litzateke: 7 dolar zati dirua irabazteko aukera ematen duten 1.500 erreprodukzio bider 1.000, hau da, 4,67 dolar.

Zergatik da garrantzitsua CPMa?

Iragarleak ordaintzen duenaren zati bat irabazten duzu iragarki bat zure bideoan erakusten denean. Iragarleak iragarkiarengatik zenbat eta gehiago ordaindu, orduan eta diru gehiago irabaziko duzu. Beren helburu komertzialak lortzeko, zure bideoak eta zure entzuleak iragarleentzat zein baliotsuak diren erakusten duen adierazle on bat da CPMa.

Batzuetan, diru-sarrerak ez dira izango CPMaren berdinak, haiek iragarleek ordaintzen dutena adierazten dutelako, ez zuk irabazten duzuna. Gainera, iragarkiak ez dira ikustaldi guztietan agertzen. Iragarkiak onartzen ez badituzte, bideo batzuek ezingo dute erakutsi iragarkirik. Baliteke bideo batzuek iragarkirik ez erakustea, erabilgarri dauden iragarkirik ez daudelako. Iragarkiak zituzten ikustaldiei dirua irabazteko aukera ematen duten erreprodukzioak deritze.

Zergatik aldatu da CPMa?

Denbora igaro ahala CPMan gertatzen diren aldaketak normalak dira. Hainbat arrazoirengatik gertatzen dira; besteak beste, hauek:

• Urteko garaia: urteko garaiaren arabera, iragarleek eskaintza handiagoak edo txikiagoak egiten dituzte. Adibidez, iragarle askok oporren aurretik eskaintza handiagoak egiten dituzte.
• Ikusleen kokapen geografikoaren aldaketa: iragarleek beren iragarkiak zein kokapen geografikoetan erakutsi nahi dituzten kontrola dezakete. Publizitatearen merkatuko lehia kokapenaren araberakoa denez, CPMa desberdina izango da kokapen geografikoaren arabera. Ikustaldi gehienen jatorria aldatzen bada, baliteke aldaketa bat ikustea CPMan. Adibidez, CPM handiago bat duen kokapen geografiko bateko ikustaldiak bazenituen, eta orain CPM txikiago bat duten kokapen geografikoetako ikustaldiak izaten ari bazara, baliteke murrizketa bat ikustea CPMan.
• Erabilgarri dauden iragarki-formatuen banaketaren aldaketa: iragarki mota desberdinek CPM desberdina izan ohi dute. Hau da, saltatu ezin diren iragarki gehiago publizitate-inbentarioan erabilgarri badaude, baliteke CPMa handiagoa izatea.

Diru-sarrera eta publizitatearen diru-sarrera estimatuak

• Diru-sarrera estimatuak: diru-sarrera mota guztietatik lortutako diru-sarrerak, hauek barne: kanaleko kidetzak, YouTube Premium-eko diru-sarrerak eta Super Chat. Neurketa hori ikusteko, joan Diru-sarrerak fitxara.
• Publizitatearen diru-sarrera estimatuak: bideoetako iragarkietatik soilik lortutako diru sarrerak. Neurketa hori diru-sarreren iturburuen txostenean ikusiko duzu.

Ikustaldiak, iragarki-agerpenak eta dirua irabazteko aukera ematen duten erreprodukzio estimatuak

• Ikustaldiak: bideoa zenbat aldiz erreproduzitu den adierazten duen kopurua.
• Iragarki-agerpenak: zure bideoko iragarkiek izandako ikustaldi kopurua.
• Dirua irabazteko aukera ematen duten erreprodukzio estimatuak: zure bideoa iragarkiekin zenbat aldiz ikusi den adierazten duen kopurua.

Bideoa hamar bider ikusi bada, eta ikustaldi horietatik zortzik iragarkiak badituzte, hamar ikustaldi eta dirua irabazteko aukera ematen duten zortzi erreprodukzio estimatu edukiko dituzu. Dirua irabazteko aukera ematen duten erreprodukzio estimatu horietatik bik iragarkiak badituzte, bederatzi iragarki-agerpen edukiko dituzu.

YouTube-ko ikustaldi guztiek ez dute iragarkik. Baliteke ikustaldi batek iragarkirik ez edukitzea arrazoi hauengatik:

• Bideoak ez du onartzen iragarkirik.
• Iragarkiak desgaituta daude bideo horretan.
• Ez dago erabilgarri iragarkirik ikusle hori erakusteko. Iragarleek gailu, datu demografiko eta interes jakin batzuei zuzentzea aukera dezakete. Baliteke ikuslea bideratze horren helburu ez izatea. Lortu bideo-iragarkietarako erabilgarri dauden bideratze-metodoei buruzko informazio gehiago.
• Beste faktore batzuk, hala nola ikusleen kokapen geografikoa, iragarki bat orain dela zenbat ikusi duten, Premium-eko harpidetza bat daukaten ala ez, eta gehiago.

Ikustaldi desberdin horien ondorioz, dirua irabazteko aukera ematen duten erreprodukzio estimatuak baino ikustaldi gehiago edukiko dituzu.