Agerpenei eta klik-tasari buruz maiz egiten diren galderak

Lortu agerpenei eta klik-tasari buruzko galdera nagusien erantzunak maiz egiten diren galdera hauekin.

Zergatik ditu nire bideo batek klik-tasa eta ikustaldien batez besteko iraupen handiak, baina agerpen gutxi?

Sortzaileek beren kanaletako beste bideoekin alderatzen dituzte bideoak. YouTube-ren sistemek, berriz, ikusle batek ikus ditzakeen beste bideo guztiekin alderatuta sailkatzen du bideo bakoitza. Bideo batek zure kanaleko beste bideoekin alderatuta errendimendu ona badu ere, baliteke beste kanal batzuetako bideoek are errendimendu hobeagoa izatea. Era berean, arrunta da agerpen eta ikustaldi gutxiago dituzten bideoek klik-tasa handiagoa eta ikustaldien batez besteko iraupen luzeagoa izatea. Zenbakiak handiagoak dira, ikus-entzuleen talde txikiago baina fidelago batek ikusten dituelako bideo horiek. Bideoen errendimendua alderatzean, kontuan izan datuek agian ikus-entzuleen arteko ezberdintasunak islatzen dituztela hobeki.

Zer saihestu beharko nuke nire klik-tasari buruzko datuekin?

• Datu gutxiegi izanda erabakiak hartzea. Agerpen kopuru esanguratsu bat lortu ondoren da garrantzitsua klik-tasari begiratzea. Ez egiaztatu klik-tasa bideo bat kargatu eta berehala.
• Klik-tasaren aldaketa txikiengatik hobekuntzak egitea. Normala da klik-tasa pixka bat aldatzea, eta ez zenituzke berehala neurriak hartu beharko. Klik-tasaren aldaketa estatistikoki esanguratsua bada, agian lagungarria izango da hobekuntzak egitea.
• Bideo berean irudi txiki edo izen bat baino gehiago probatzea. Zaila da bideo bakoitza ikus-entzuleen talde berak ikusten duela ziurtatzea. Baliteke klik-tasaren ezberdintasunak trafiko-iturburuengatik izatea, eta ez izenarengatik edo irudi txikiarengatik.

Nola jakin dezaket nire agerpenen klik-tasa handia edo txikia den?

Agerpenen klik-tasak hau neurtzen du: ikusleek bideo bat zenbat aldiz ikusi duten YouTube-ko agerpen erregistratu bat ikusi ondoren. Ziurrenik, kanalaren ikustaldi guztien zati bat baino ez da hori, neurketa horrek agerpen guztiak zenbatzen ez baititu (adibidez, kanpoan uzten ditu kanpoko webguneetakoak edo amaierako pantailetakoak).

Agerpenen klik-tasa ezberdina izango da eduki motaren, ikus-entzuleen eta agerpenari dagokion YouTube-ko atalaren arabera. Kontuan izan zure bideoen irudi txikiak beti dabiltzala lehian beste bideoen aurka, orri nagusian, bistaratze-orriko Hurrengoa panelean, bilaketa-emaitzetan nahiz Harpidetzen jarioan.

YouTube-ko kanal eta bideo guztien erdiaren agerpenen klik-tasa % 2 eta % 10 artekoa da.

Bideo edo kanal berriek (adibidez, astebete baino gutxiago dutenek) edo 100 ikustaldi baino gutxiago dituzten bideoek are tarte zabalagoa dute. Bideo batek agerpen asko lortzen baditu (adibidez, orri nagusian agertzen bada), normala da klik-tasa txikiagoa izatea. Bideo baten agerpen gehienak kanalaren orrikoak edo antzeko iturburu batekoak badira, baliteke klik-tasa handiagoa izatea.

Ondorioz, klik-tasak bideoen artean eta epe luzean alderatzea da hoberena, trafiko-iturburuek klik-tasan duten eragina kontuan izanda.

Ez saiatu klik-tasa handiagotzen klik egiteko amuak diren irudi txikiak edo izenak erabilita. YouTube-k haientzat egokia bada gomendatuko die bideoa ikusleei, eta ikustaldien batez besteko iraupenak bideoa ikusleei interesatzen zaiela adierazten badu. Klik egiteko amuak dituzten bideoek ikustaldien batez besteko iraupen txikia izan ohi dute; beraz, YouTube-k gomendatzeko probabilitate txikiagoa dute. Irudi txikia klik egiteko amu bat dela jakingo duzu klik-tasa handia eta ikustaldien batez besteko iraupen txikia baditu, eta espero baino agerpen gutxiago baditu.

Zergatik ditut agerpen baino ikustaldi gehiago?

Zure bideo baten trafikoaren zati garrantzitsu bat YouTube-z kanpotik badator, baliteke agerpen baino ikustaldi gehiago izatea. Ikusle batek bideoaren irudi txikia ikusten duenean ez da beti agerpen bat zenbatuko, eta ikustaldi batzuk ez datoz irudi txikien agerpenetatik. Jakin zer den agerpen erregistratu bat.

Zergatik ez datoz bat klik-tasaren neurketa eta nik kalkulatu dudana?

Zenbatutako agerpenetatik datozen ikustaldietan oinarritzen da klik-tasa. Bideoaren ikustaldien guztizkoa agerpen kopuruarekin zatituz gero, agian ez duzu lortuko klik-tasaren zenbaki bera. Ikustaldi batzuk ez datoz irudi txikien agerpenetatik.

Zein da agerpenen eta dirua irabazteko aukeraren arteko erlazioa?

Bideo bat ikus-entzuleria zabal batentzat egokia ez bada gure Komunitate-gidalerroen arabera, baliteke bideoak lortzen dituen agerpen kopurua mugatuta egotea. Muga horrengatik, baliteke ikustaldi eta diru-sarrera gutxiago lortzea. Gainera, bideo bat iragarle gehienentzat egokia ez bada iragarkiak onartzen dituen edukiaren gidalerroen arabera, baliteke bideoak iragarki gutxi lortzea, edo iragarkirik ez.

Oharra: kontuan izan iradokizun hauek YouTube osoko arrakasta-tasa bateratuetan oinarrituta daudela. Ez dute bermatzen emaitza jakinen bat lortuko duzunik zure kasuan.