Kuelewa ukadiriaji wa umri kwenye YouTube

Kumbuka: Mfumo wa YouTube wa kukadiria umri hautumiki kufikia vipengele vya kina. Pata maelezo zaidi kuhusu kupata idhini ya kutumia vipengele vya wastani na vya kina

Kuelewa Ulinzi wa Uhakikishaji wa Umri kwenye YouTube

Tumejitolea kuwapa watumiaji ulinzi pamoja na hali bora zaidi ya utumiaji inayoambatana na umri kwenye YouTube. Hii huanza na watumiaji kutueleza umri wao wanapofungua akaunti. Ili kutoa hali salama na bora zaidi ya utumiaji kwa vijana, tunatumia pia mfumo wa kukadiria umri ili kubaini ikiwa mtumiaji ana umri unaozidi au usiozidi miaka 18. Huwa tunafanya hivi bila kujali tarehe ya kuzaliwa katika akaunti yao ili kuwalinda vijana zaidi kwenye YouTube.

Iwapo mfumo wetu wa kukadiria umri utabaini kuwa mtumiaji ana umri usiozidi miaka 18, ulinzi wa kawaida kwa vijana huwekwa kiotomatiki kwenye hali yake ya utumiaji wa YouTube (maelezo zaidi hapa chini). Kwa sasa mfumo huu unatumika katika nchi kadhaa, ikiwa ni pamoja na Australia, Brazili, Singapoo, Uswizi, Uingereza, Marekani na nchi washirika katika Makubaliano ya Kiuchumi ya Ulaya. Tutaendelea kupanua upatikanaji katika nchi zaidi hivi karibuni.

Kumbuka: Iwapo unaamini kuwa mfumo wa kukadiria umri umekosea katika kubaini umri wako, unaweza kuthibitisha umri wako wakati wowote kwa kutuma picha ya kitambulisho chako kilichotolewa na serikali, kadi ya mikopo au selfi kupitia mchakato wa uthibitishaji kwenye Akaunti yako ya Google. Pata maelezo zaidi kuhusu kuthibitisha umri wako.

Fahamu kuhusu ulinzi kwa watazamaji

Iwapo mfumo wetu wa kukadiria umri utabaini kuwa mtumiaji ana umri usiozidi miaka 18, mabadiliko haya yatatekelezwa kiotomatiki kwenye akaunti yake:

• Maudhui yenye mipaka ya umri: Watumiaji hawataweza kutazama video zenye mipaka ya umri. Pata maelezo zaidi kuhusu maudhui yenye mipaka ya umri.
• Nidhamu dijitali: Vikumbusho vya kupumzika na wakati wa kulala vitawashwa kwa chaguomsingi. Pata maelezo zaidi kuhusu vipengele vya nidhamu kwenye YouTube.
• Kuweka ulinzi kwenye mapendekezo: Mapendekezo yatarekebishwa ili kupunguza maudhui ambayo, ingawa yanakubalika kwa kiasi, yanaweza kusababisha matatizo kwa baadhi ya watazamaji wachanga yanapotazamwa mara kwa mara. Pata maelezo zaidi kuhusu jinsi tunavyopendekeza maudhui ili kukidhi mahitaji maalum ya vijana.
• Vikumbusho vya usalama: Watumiaji watapokea vikumbusho vya kuzingatia faragha yao kwa makini wanapotoa maoni kwa umma.
• Matangazo: Watumiaji wataonyeshwa tu matangazo ambayo hayawekewi mapendeleo. Zaidi ya hayo, watumiaji hawataona aina nyeti za matangazo kama vile ya Kamari na Pombe. Pata maelezo zaidi kuhusu sera dhidi ya kuwaonyesha vijana wachanga matangazo.
• Kucheza kiotomatiki: Watumiaji watadokezwa wawashe au wazime kipengele cha Kucheza Kiotomatiki. Pata maelezo zaidi kuhusu chaguo za Kucheza Kiotomatiki kwenye YouTube.
• Podikasti: Watazamaji hawawezi kuweka podikasti kupitia mipasho ya RSS.

Fahamu kuhusu ulinzi kwa watayarishi

Tukibainisha kuwa mtayarishi ana umri usiozidi miaka 18, mabadiliko yafuatayo yatatekelezwa kiotomatiki kwenye akaunti yake pamoja na mipangilio iliyo hapo juu:

• Maudhui yanayopakiwa na kubainishwa kuwa ya faragha: Maudhui yote mapya yanayopakiwa na watayarishi yatabainishwa kuwa ya faragha katika Studio ya YouTube. Watayarishi wana uwezo wa kukagua na kusasisha mipangilio hii ya faragha wakati wowote.

• Zawadi: Watayarishi hawataweza kuchuma mapato kutokana na zawadi kwenye mitiririko mubashara iliyo wima, inayowahitaji watumiaji wawe wamekadiriwa au wamethibitishwa kuwa wana umri wa miaka 18 au zaidi.
• Vikumbusho vya usalama: Watayarishi watapata vikumbusho vya kuzingatia faragha yao kwa makini wanapopakia video au kutoa maoni kwa umma.

Kumbuka: Kwa sasa ripoti za hadhira katika takwimu zinaonyesha tu utazamaji kulingana na umri ambao mtumiaji aliweka wakati wa kufungua akaunti. Haionyeshi watumiaji waliobainishwa na mfumo wetu wa kukadiria umri kuwa wana umri usiozidi miaka 18 kwa wakati huu. Tunajitahidi kutekeleza mabadiliko haya na tutatoa maelezo zaidi hivi karibuni.