ລະບົບຂອງພວກເຮົາຈະກວດສອບການເຂົ້າເບິ່ງວິດີໂອເປັນປະຈຳເພື່ອຕັດສິນວ່າການເຂົ້າເບິ່ງນັ້ນຖືກຕ້ອງ ຫຼື ບໍ່ຖືກຕ້ອງ. ການເຂົ້າເບິ່ງບໍ່ຖືກຕ້ອງ ແມ່ນກິດຈະກຳໃດກໍຕາມຢູ່ຊ່ອງຂອງທ່ານທີ່ບໍ່ໄດ້ມາຈາກຜູ້ໃຊ້ແທ້ ຫຼື ຜູ້ໃຊ້ທີ່ມີຄວາມສົນໃຈແທ້ໆ. ເຊິ່ງສາມາດຮວມທັງ, ແຕ່ບໍ່ຈຳກັດສະເພາະການສໍ້ໂກງ, ການປອມແປງ ຫຼື ແມ່ນແຕ່ວິທີການເພີ່ມລາຍໄດ້ໂຄສະນາໃຫ້ກັບວິດີໂອໂດຍບໍ່ໄດ້ຕັ້ງໃຈ. ການເຂົ້າເບິ່ງບໍ່ຖືກຕ້ອງອາດສົ່ງຜົນກະທົບຕໍ່ຊ່ອງຂອງທ່ານ, ເຖິງແມ່ນວ່າທ່ານຈະບໍ່ໄດ້ຕັ້ງໃຈກະຕຸ້ນການເຂົ້າເບິ່ງເຫຼົ່ານັ້ນກໍຕາມ.
ຫາກພົບວ່າບັນຊີ AdSense ສຳລັບ YouTube ຂອງທ່ານເຊື່ອມໂຍງກັບການເຂົ້າເບິ່ງບໍ່ຖືກຕ້ອງ, ພວກເຮົາອາດປິດການນຳໃຊ້ບັນຊີດັ່ງກ່າວຂອງທ່ານ. ການປິດການນຳໃຊ້ບັນຊີຂອງທ່ານຊ່ວຍປົກປ້ອງແພລດຟອມຂອງພວກເຮົາສຳລັບຜູ້ສ້າງ, ຜູ້ລົງໂຄສະນາ ແລະ ຜູ້ຊົມ. ໂດຍການປົກປ້ອງລະບົບການໂຄສະນາຂອງພວກເຮົາຈາກການເຂົ້າເບິ່ງບໍ່ຖືກຕ້ອງ, ຜູ້ລົງໂຄສະນາສາມາດລົງທຶນໄດ້ຢ່າງໝັ້ນໃຈໃນ YouTube, ເຊິ່ງຈະເປັນການຊ່ວຍໃຫ້ຜູ້ສ້າງເຊັ່ນທ່ານສາມາດສ້າງລາຍໄດ້ຈາກເນື້ອຫາຂອງທ່ານ.
ບັນຊີຂອງຂ້ອຍຈະໄດ້ຮັບການເປີດໃຊ້ຄືນຫຼັງຈາກທີ່ຖືກປິດການນໍາໃຊ້ເນື່ອງຈາກມີການເຂົ້າເບິ່ງບໍ່ຖືກຕ້ອງຫຼືບໍ່?
ໃນກໍລະນີສ່ວນໃຫຍ່, ລະບົບຂອງພວກເຮົາຈະພິຈາລະນາການເຂົ້າເບິ່ງບໍ່ຖືກຕ້ອງໄດ້ຢ່າງຖືກຕ້ອງ. ແຕ່, ຫາກທ່ານຮູ້ສຶກວ່າການຕັດສິນນີ້ເກີດຂໍ້ຜິດພາດ, ທ່ານສາມາດສົ່ງ ການອຸທອນກິດຈະກຳບໍ່ຖືກຕ້ອງ ໄດ້. ທ່ານ ແລະ ບຸກຄົນທີ່ທ່ານຮັບຜິດຊອບຕ້ອງບໍ່ເຮັດໃຫ້ເກີດການເຂົ້າເບິ່ງບໍ່ຖືກຕ້ອງທັງທາງກົງ ຫຼື ທາງອ້ອມ.
ເມື່ອພວກເຮົາໄດ້ຮັບການອຸທອນຂອງທ່ານ, ພວກເຮົາຈະກວດສອບຂໍ້ມູນທີ່ທ່ານລະບຸຢ່າງລະອຽດ ແລະ ຈະແຈ້ງການຕັດສິນຂັ້ນສຸດທ້າຍໃຫ້ທ່ານຮັບຊາບ. ກະລຸນາຮັບຊາບວ່າການດໍາເນີນການຂອງພວກເຮົາບໍ່ໄດ້ເປັນການຮັບປະກັນວ່າບັນຊີຂອງທ່ານຈະໄດ້ຮັບການເປີດໃຊ້ຄືນ. ຫຼັງຈາກທີ່ພວກເຮົາໄດ້ຕັດສິນໃຈກ່ຽວກັບການອຸທອນຂອງທ່ານແລ້ວ, ພວກເຮົາອາດບໍ່ພິຈາລະນາການອຸທອນໃນເທື່ອຕໍ່ໄປອີກ.
ເຄັດລັບໃນການຂຽນຄຳອຸທອນການເຂົ້າເບິ່ງບໍ່ຖືກຕ້ອງໃຫ້ປະສົບຄວາມສໍາເລັດມີຫຍັງແດ່?
- ກະລຸນາອ່ານ ຕົວຢ່າງຂອງການເຂົ້າເບິ່ງບໍ່ຖືກຕ້ອງ ເຫຼົ່ານີ້. ເຫດຜົນເຫຼົ່ານີ້ມີຜົນກັບທ່ານ ຫຼື ເນື້ອຫາຂອງທ່ານຫຼືບໍ່? ມີໃຜຄລິກໂຄສະນາຂອງທ່ານຫຼາຍຄັ້ງເກີນໄປຫຼືບໍ່? ທ່ານໄດ້ຊື້ການເຂົ້າເບິ່ງທີ່ເຮັດໃຫ້ການເຂົ້າເບິ່ງບໍ່ຖືກຕ້ອງຂອງທ່ານເພີ່ມຂຶ້ນຢ່າງວ່ອງໄວຫຼືບໍ່? ທ່ານສາມາດປ່ຽນແປງເນື້ອຫາ ຫຼື ພຶດຕິກໍາເພື່ອປ້ອງກັນບໍ່ໃຫ້ການເຂົ້າເບິ່ງບໍ່ຖືກຕ້ອງເກີດຂຶ້ນອີກໄດ້ຫຼືບໍ່?
- ໃນ ແບບຟອມຍື່ນອຸທອນກິດຈະກຳບໍ່ຖືກຕ້ອງ, ໃຫ້ແບ່ງປັນທີ່ຢູ່ອີເມວທີ່ເຊື່ອມໂຍງກັບບັນຊີ AdSense ສຳລັບ YouTube ທີ່ຖືກປິດການນຳໃຊ້ຂອງທ່ານ. ການແບ່ງປັນອີເມວໃນແບບຟອມດັ່ງກ່າວຈະຊ່ວຍໃຫ້ພວກເຮົາພົບບັນຊີຂອງທ່ານ ແລະ ຫຼຸດຄວາມຫຼ້າຊ້າໃນການປະມວນຜົນການອຸທອນຂອງທ່ານ.
- ລະບຸສາເຫດທີ່ເປັນໄປໄດ້ທີ່ເຮັດໃຫ້ເກີດມີການເຂົ້າເບິ່ງບໍ່ຖືກຕ້ອງໃນວິດີໂອຂອງທ່ານ. ນອກຈາກນີ້, ໃຫ້ແບ່ງປັນວິທີທີ່ທ່ານຈະຊ່ວຍປ້ອງກັນບໍ່ໃຫ້ການເຂົ້າເບິ່ງບໍ່ຖືກຕ້ອງເກີດຂຶ້ນອີກ. ກະລຸນາໃຫ້ຂໍ້ມູນຫຼາຍທີ່ສຸດເທົ່າທີ່ເປັນໄປໄດ້ເພື່ອອະທິບາຍກໍລະນີຂອງທ່ານ.
- ຕົວຢ່າງ: ແຈ້ງໃຫ້ພວກເຮົາຮູ້ຫາກທ່ານຊື້ການເຂົ້າເບິ່ງຈາກພາກສ່ວນທີສາມເພື່ອເພີ່ມຈຳນວນຜູ້ຊົມຂອງທ່ານ. ແບ່ງປັນເຫດຜົນທີ່ທ່ານລົ້ມເລີກການເຮັດວຽກກັບພາກສ່ວນທີສາມນີ້ ແລະ ຈະບໍ່ເຮັດວຽກຮ່ວມກັບພາກສ່ວນທີສາມນີ້ສຳລັບການໂປຣໂໝດຊ່ອງໃນອະນາຄົດ.
ບັນຊີຂອງຂ້ອຍຖືກປິດການນໍາໃຊ້ ແລະ ການອຸທອນຂອງຂ້ອຍຖືກປະຕິເສດ. ຂ້ອຍສາມາດເຂົ້າຮ່ວມໂປຣແກຣມຄືນໃໝ່ ຫຼື ເປີດບັນຊີໃໝ່ໄດ້ບໍ່?
ພວກເຮົາເຂົ້າໃຈເຖິງຄວາມກັງວົນຂອງທ່ານກ່ຽວກັບການດໍາເນີນການຕໍ່ກັບບັນຊີຂອງທ່ານ. ການດຳເນີນການຂອງພວກເຮົາເປັນຜົນມາຈາກການສືບສວນຢ່າງຮອບຄອບໂດຍທີມງານຜູ້ຊ່ຽວຊານຂອງພວກເຮົາ, ໂດຍຄຳນຶງເຖິງຜົນປະໂຫຍດຂອງຜູ້ລົງໂຄສະນາ, ຜູ້ສ້າງ ແລະ ຜູ້ຊົມຂອງພວກເຮົາ.
ຜູ້ສ້າງທີ່ບັນຊີຖືກປິດການນໍາໃຊ້ເນື່ອງຈາກການເຂົ້າເບິ່ງບໍ່ຖືກຕ້ອງຈະບໍ່ໄດ້ຮັບອະນຸຍາດໃຫ້ເຂົ້າຮ່ວມໃນ AdSense ອີກ. ດ້ວຍເຫດຜົນນີ້, ຜູ້ສ້າງເຫຼົ່ານີ້ຈຶ່ງບໍ່ສາມາດເປີດບັນຊີໃໝ່ໄດ້.
Google ຂໍສະຫງວນສິດໃນການປິດການນໍາໃຊ້ບັນຊີບໍ່ວ່າຈະດ້ວຍເຫດຜົນໃດກໍຕາມ, ຮວມທັງການເຂົ້າເບິ່ງບໍ່ຖືກຕ້ອງບໍ່ວ່າຈະມາຈາກແຫຼ່ງທີ່ມາໃດກໍຕາມ.
ຍ້ອນຫຍັງບັນຊີຂອງຂ້ອຍຈຶ່ງຖືກປິດການນຳໃຊ້ເນື່ອງຈາກກ່ຽວຂ້ອງກັບບັນຊີອື່ນທີ່ຖືກປິດການນຳໃຊ້?
ຫາກບັນຊີທີ່ກ່ຽວຂ້ອງຖືກປິດການນຳໃຊ້, ອາດເນື່ອງຈາກຜູ້ຊ່ຽວຊານຂອງພວກເຮົາພົບວ່າບັນຊີຂອງທ່ານມີຄວາມສ່ຽງຕໍ່ຜູ້ສ້າງ, ຜູ້ຊົມ ແລະ ຜູ້ລົງໂຄສະນາຂອງພວກເຮົາ.
ຂ້ອຍຈະຍັງຄົງໄດ້ຮັບລາຍໄດ້ຈາກ AdSense ສຳລັບ YouTube ຂອງຂ້ອຍຫຼືບໍ່?
ຫາກບັນຊີຂອງທ່ານຖືກປິດການນຳໃຊ້ເນື່ອງຈາກການເຂົ້າເບິ່ງບໍ່ຖືກຕ້ອງ ຫຼື ການລະເມີດນະໂຍບາຍຂອງພວກເຮົາ, ທ່ານອາດມີສິດໄດ້ຮັບການຈ່າຍເງິນຄັ້ງສຸດທ້າຍຈາກລາຍໄດ້ໃນພາກສ່ວນທີ່ບໍ່ມີການລະບຸວ່າບໍ່ຖືກຕ້ອງ. ເມື່ອມີການປິດການນຳໃຊ້ບັນຊີ, ລະບົບຈະລະງັບການຈ່າຍເງິນເປັນເວລາ 30 ມື້ ເພື່ອໃຫ້ພວກເຮົາຄິດໄລ່ການຈ່າຍເງິນຄັ້ງສຸດທ້າຍໄດ້ (ຫາກມີ). ຫຼັງຈາກໄລຍະ 30 ມື້ນີ້, ໃຫ້ ເຂົ້າສູ່ລະບົບ AdSense ສຳລັບ YouTube ເພື່ອເບິ່ງຍອດຄົງເຫຼືອທີ່ມີສິດ (ຫາກມີ) ແລະ ຈັດການການຈ່າຍເງິນ. ພວກເຮົາຈະເອົາເງິນທີ່ຫັກລົບຈາກຍອດຄົງເຫຼືອສຸດທ້າຍຂອງທ່ານເນື່ອງຈາກການເຂົ້າເບິ່ງບໍ່ຖືກຕ້ອງ ແລະ ການລະເມີດນະໂຍບາຍຂອງຜູ້ສ້າງຄືນໃຫ້ກັບຜູ້ລົງໂຄສະນາທີ່ໄດ້ຮັບຜົນກະທົບຕາມຄວາມເໝາະສົມ ແລະ ເປັນໄປໄດ້.
ຂ້ອຍຈະຍັງຄົງໄດ້ຮັບແບບຟອມອາກອນສຳລັບການຈ່າຍເງິນທີ່ຂ້ອຍໄດ້ຮັບຫຼືບໍ່?
ທ່ານອາດຍັງຄົງໄດ້ຮັບແບບຟອມອາກອນຈາກພວກເຮົາຫາກທ່ານກົງກັບກໍລະນີຕໍ່ໄປນີ້:
- ເຄີຍໄດ້ຮັບການຈ່າຍເງິນຈາກພວກເຮົາ ຫຼື
- ຍັງມີຍອດຄົງເຫຼືອທີ່ສາມາດຈ່າຍໄດ້ໃນບັນຊີຂອງທ່ານ
ສຶກສາເພີ່ມເຕີມກ່ຽວກັບ ການຈ່າຍອາກອນສຳລັບລາຍໄດ້ຈາກ AdSense ສຳລັບ YouTube.
ບັນຊີຂອງຂ້ອຍຖືກເປີດໃຊ້ຄືນໃໝ່ແລ້ວ. ຍ້ອນຫຍັງໂຄສະນາຈຶ່ງຍັງບໍ່ສະແດງໃນເວັບໄຊ, ແອັບ ຫຼື ວິດີໂອຂອງຂ້ອຍ?
ຫຼັງຈາກທີ່ບັນຊີຂອງທ່ານຖືກເປີດໃຊ້ຄືນໃໝ່ແລ້ວ, ອາດໃຊ້ເວລາສູງສຸດ 48 ຊົ່ວໂມງ ເພື່ອໃຫ້ໂຄສະນາກັບມາສະແດງຄືນໃໝ່.