Ang Google Nest Wifi Pro, Nest Wifi, at Google Wifi ay mga mesh network na Wi-Fi system na naghahatid ng coverage ng radyo sa pamamagitan ng Wi-Fi at Matter sa iyong buong bahay. Ang mesh network ay isang grupo ng mga device para sa pagkakakonekta, gaya ng mga Wi-Fi router na kumikilos bilang iisang network, kaya maraming nagiging source ng pagkakakonekta sa iyong bahay sa halip na iisang router lang. Tatawaging router ng Google ang unang mesh device na ise-set up mo, at tatawagin nitong point ang bawat karagdagang mesh device.
Dahil nagbo-broadcast ang mga mesh network mula sa bawat point sa iyong bahay sa halip na mula sa iisang lokasyon, makakapagbigay ang mga ito ng pinahusay na coverage sa mas malawak na espasyo. Depende sa laki ng iyong bahay, puwede kang magdagdag ng higit pang point para sa karagdagang coverage ng Wi-Fi. Alamin kung ilang Wifi device ang kailangan mo.
Wireless na nakakonekta sa isa't isa ang lahat ng point. Hangga't magkakalapit ang mga ito, magagawa ng mga ito na makipag-ugnayan sa isa't isa nang hindi nangangailangan ng router o switch. Kaya naman magiging mabilis at efficient ang pagruruta ng data.
Para sa mga mas gusto ng mga wired na koneksyon, puwede ring ikonekta sa isa't isa ang mga Nest Wifi Pro, Nest Wifi, Google Wifi, at iba pang device gaya ng mga computer, printer, at TV sa pamamagitan ng mga Ethernet cable. Matuto pa tungkol sa pag-hardwire ng mga Wifi router at point.
Kaibahan sa mga tradisyonal na Wi-Fi network
Sa isang tradisyonal na Wi-Fi network, nakakonekta ang iyong telepono o laptop sa iisang router, at dumaraan ang lahat ng komunikasyon sa iisang router na iyon. Kapag mas malayo ka sa router, mas mahina ang signal. Puwedeng makaapekto ang mga bagay gaya ng mga pader, muwebles, at iba pang harang sa distribusyon ng mga wireless na signal sa iyong buong bahay.
Sa mga mesh system, nagkakaroon ka ng maraming point para sa pagkakakonekta sa iyong bahay, kaya hindi ka nalalayo sa isa kahit kailan.
Mga benepisyo ng mesh network
- Flexible na coverage: Puwedeng magdagdag ng higit pang point para sa pinahusay na coverage sa mga lugar na mahirap abutin gaya ng mga pasilyo at lugar na malapit sa pader para sa coverage sa labas ng bahay.
- Self-healing: Sa isang mesh network, kung hihinto sa paggana ang isang point, iibahin lang ang ruta ng komunikasyon sa pamamagitan ng ibang point. Tandaan: Kung mag-o-offline ang iyong router o pangunahing point (ang point na nakakonekta sa modem mo), mag-o-offline din ang iyong buong network. Makakatanggap ka rin ng notification sa app pagkalipas ng ilang minuto.
- Direktang path: Dahil nakakonekta sa isa't isa ang lahat ng point, puwedeng gumamit ang data ng iba't ibang path papunta sa patutunguhan nito at palagi nitong pipiliin ang pinakamagandang ruta mula sa Point A papunta sa Point B.