Ang ginagawa ng Google Wifi
- Ang Google Wifi ay isang pambahay na mesh Wi-Fi system na pumapalit sa iyong tradisyonal na router at nagbibigay ng tuluy-tuloy at maaasahang coverage ng Wi-Fi sa buong bahay mo. Kakailanganin mo pa rin ng Internet Service Provider (ISP) at modem para makakonekta sa internet.
- Mabilis kang makakapag-set up ng maraming Google Wifi device (na tinatawag ding "mga point") para madala ang internet sa kung saan mo ito gusto, gaya ng sa iyong opisina, sala, garahe, o basement. Para sa refresher sa mga termino at konsepto ng Wi-Fi, tingnan ang mga pangunahing kaalaman sa Wi-Fi.
- Ang Google Wifi ay nakabatay sa aming teknolohiyang mesh Wi-Fi. Kapag na-set up mo na ang iyong mesh network, ang mga Google Wifi point ay gagawa ng malakas na koneksyon at magtutulungan ang mga ito para matiyak na mananatili ang iyong mga device sa pinakamalinaw na channel na may pinakamabilis na bandwidth. Ang resulta ay mabilis na Wi-Fi sa lahat ng sulok ng iyong bahay, hindi lang sa tabi ng router. Puwede ka pang maglibot sa buong bahay habang ikaw ay nakikipag-video call o nagsi-stream ng pelikula nang hindi nawawala ang signal.
- Puwedeng gamitin ang Google Wifi bilang standalone system o puwedeng itong isama sa Nest Wifi para sa karagdagang coverage.
Tandaan: Hindi puwedeng isama ang Nest Wifi Pro (Wi-Fi 6E) sa mga Nest Wifi router o point o Google Wifi point (Wi-Fi 5) sa isang mesh network.
Ang kailangan mo
- Modem
- Serbisyo sa internet
- Google Account
- Isa sa mga sumusunod na mobile device:
- Android phone o tablet na may Android 9.0 o mas bago
- iPhone o iPad na may iOS 15.0 o mas bago
- Ang pinakabagong bersyon ng Google Home app sa Android o iOS.
Tandaan: Lubos na inirerekomendang bilhin mo ang Google Wifi sa bansa kung saan mo ito gagamitin. Dahil nag-iiba ang mga regulasyon sa wireless ayon sa bansa, puwede kang makaranas ng mga isyu sa performance o paglabag sa regulator kung ililipat mo ang iyong (mga) Wifi device sa ibang bansa at hindi makakapagbigay ng suporta ang Google.
Mga madalas itanong
Ano ang kaibahan ng Google Wifi?
- Hindi idinisenyo ang mga tradisyonal na router para sa lahat ng iba't ibang paraan ng paggamit natin ng Wi-Fi sa panahon ngayon. Dahil sa mga pader at distansya, kapag iisa lang ang router, nahihirapang magpadala ng malakas na signal sa bawat kuwarto sa iyong bahay, na nagreresulta sa mabagal na Wi-Fi at mga lugar na walang signal.
- Ang Google Wifi ay isang pambahay na Wi-Fi system na nagbibigay sa iyo ng maaasahang internet sa mas maraming lugar sa bahay mo.
- Bukod pa sa mahusay na sakop, pinapanatiling malakas ng Google Wifi ang signal mo sa pamamagitan ng paglipat sa iyo sa pinakamagandang Wifi point habang lumilipat ka sa iba't ibang bahagi ng bahay mo at sa tamang channel ng Wi-Fi para maiwasan ang congestion.
- Kailangan pa ng mas malakas na signal? Maglagay ng mga karagdagang point sa iba't ibang kuwarto para sa mabilis na Wi-Fi sa bawat sulok ng iyong bahay. Inirerekomenda naming ilagay ang mga ito sa mga hindi tagong lugar, nang may pagitang isa hanggang 2 kuwarto.
- Gamit ang Pampamilyang Wi-Fi, ikaw ang magpapasya kung kailan magkakaroon ng access sa internet ang iyong mga anak sa kanilang mga device. Puwede mong i-pause ang mga device ng iyong mga anak ayon sa kinakailangan o nang may regular na iskedyul at awtomatikong i-block ang access sa milyon-milyong website na para sa nasa hustong gulang.
Gagana ba ang Google Wifi sa kasalukuyan kong setup?
-
Ang bawat Google Wifi point ay router na idinisenyong gumana sa kasalukuyan mong ISP at modem.
- Sa mga Nest Wifi at Google Wifi router at point lang puwedeng gumawa ng mesh network ang Google Wifi. Kung hindi tugma ang router mo, gaya ng router ng Cisco, Linksys, o Netgear, hindi ito magme-mesh sa iyong mga Google Wifi point.
- Gumagana ang Google Wifi sa karamihan ng mga nakakonektang wireless na device pati sa mga tablet, printer, at smart na appliance. Bagama't tugma ang karamihan ng mga device sa Google Wifi, may ilang hindi tugma.
- Tandaan: Hindi puwedeng isama ang Nest Wifi Pro (Wi-Fi 6E) sa mga Nest Wifi router o point o Google Wifi point (Wi-Fi 5) sa isang mesh network.
Alamin kung paano mag-set up ng Google Wifi.
Magagamit ko ba ang Google Wifi bilang extender?
Hindi puwedeng gamitin ang Google Wifi bilang extender o repeater para sa kasalukuyan mong router. Gumagana ang Google Wifi bilang mesh network, at pinapalawak nito ang signal ng iyong Wi-Fi na nasa iisang network para sa tuluy-tuloy na coverage at maaasahang internet sa buong bahay mo.1
Wireless ba ang mga Google Wifi point?
Kailangan ay nakakonekta ang iyong pangunahing Wifi point sa isang modem sa pamamagitan ng Ethernet cable (ibinigay). Puwedeng wireless na mag-set up ng mga karagdagang Google Wifi point, pero puwede mo ring i-hardwire ang iyong mga Wifi device.
1Puwedeng makaapekto ang puwesto ng router at ang laki, mga materyales, at layout ng bahay sa pagdaloy ng signal ng Wi-Fi. Kung hindi maganda ang puwesto nito, at sa mas malalaking bahay na may mas makakapal na pader o mahahaba at makikipot na layout, posibleng kailanganin ng mga karagdagang Wifi point para magkaroon ng coverage sa buong bahay. Dedepende rin sa iyong internet provider ang lakas at bilis ng signal. Ang pagkakaroon ng mahigit sa 5 point sa isang network ay posibleng magresulta sa hindi magandang performance at hindi inirerekomenda.