Seguridad at privacy ng data sa mga device na gumagana sa Assistant

Ang artikulong ito sa Help Center ay nagbibigay ng mga detalye tungkol sa privacy at seguridad para sa mga device at serbisyo para sa nakakonektang home ng Google na gumagana sa Google Assistant. Para mas maunawaan kung paano kami nangongolekta at gumagamit ng data kapag ginagamit mo ang aming mga device at serbisyo para sa nakakonektang home, basahin ang Mga Madalas Itanong Tungkol sa Privacy: Google Nest. Pakibasa rin ang dedikasyon ng Google sa privacy sa tahanan.

Pangongolekta ng data

Anong impormasyon ang kinokolekta ng Google kapag nakikipag-ugnayan ako sa Google Assistant?

Ipinapaliwanag ng Patakaran sa Privacy ng Google kung anong impormasyon ang kinokolekta namin, bakit namin ito kinokolekta, at paano mo maa-update, mapapamahalaan, mae-export, at made-delete ang iyong impormasyon, pati na rin kapag nakipag-ugnayan ka sa Google Assistant. Matuto pa tungkol sa Assistant at sa iyong privacy kung saan namin ipinapaliwanag kung paano pinapangasiwaan ang data ng audio mo kapag nakipag-ugnayan ka sa Assistant gamit ang device para sa nakakonektang home ng Google, pati na rin ang mga kontrol na available sa iyo. Puwede mong suriin at i-update ang mga setting ng iyong Google Account anumang oras para piliin kung ano ang ibabahagi mo sa iyong Assistant.

Idinisenyo ang Google Assistant para maghintay nang nasa standby mode hanggang sa may ma-detect itong pag-activate, tulad ng kapag narinig nito ang “Ok Google.” Sa standby mode, nagpoproseso ang device ng maiikling snippet ng audio (ilang segundo) para mag-detect ng pag-activate (tulad ng “Ok Google”). Kung walang made-detect na pag-activate, hindi ipapadala o ise-save sa Google ang mga snippet ng audio na iyon. Kapag naka-detect ito ng pag-activate, lalabas ang Assistant sa standby mode at ipapadala nito ang iyong kahilingan sa mga server ng Google. Halimbawa, puwede itong mangyari kapag may ingay na parang “Ok Google” o may hindi sinadyang manual na pag-activate.

Ipinapaalam sa iyo ng status indicator sa device mo kapag naka-activate ang Google Assistant. Para makatulong na mapanatiling ikaw ang may kontrol, patuloy kaming nagsisikap para mas mapahusay ang Assistant sa pagbabawas ng hindi sinasadyang pag-activate.

Makakakuha ba ng impormasyon ang Google Assistant mula sa iba ko pang app?    

Ginagamit ng Google ang impormasyong papayagan mong i-access nito, gaya ng iyong mga contact sa device o aktibidad sa mga site at app ng Google, para makapagbigay ng mas mahusay at mas kapaki-pakinabang na mga sagot sa pamamagitan ng Google Assistant. Puwede ring magbahagi ng impormasyon sa Google ang mga serbisyo ng third party alinsunod sa sariling mga patakaran sa privacy ng mga ito kapag pinili mong gamitin ang mga serbisyong iyon sa pamamagitan ng mga serbisyo ng Google, kasama na ang Google Assistant.

Maa-access ba ng Google Assistant o Google Home app ang aking history ng paghahanap / history ng lokasyon?  

Oo. Nagbibigay-daan sa iyo ang mga kontrol ng aktibidad sa Google Account mo na magpasya kung anong data ang sine-save at ginagamit sa mga serbisyo ng Google. Halimbawa, kung na-enable mo ang setting na Aktibidad sa Web at App magagamit ng Google Assistant app at Home app ang iyong history ng paghahanap para makapagbigay sa iyo ng mas mahusay at mas kapaki-pakinabang na mga sagot mula sa Google Assistant. Hinihingi ng Google Home app ang iyong address habang nagse-set up. Kung pipiliin mong hindi ito gawin, tatantyahin ng Google Home app ang iyong lokasyon batay sa IP address mo at sa iba pang signal para makapagtakda ng mga alarm para sa tamang time zone at makapagbigay sa iyo ng kaugnay na impormasyon sa lagay ng panahon at trapiko.

Ano ang alam ng Google tungkol sa akin kapag ginagamit ko sa Google Assistant ang mga device at serbisyo nitong para sa home?

Kung pinili mong magbahagi ng impormasyon sa Google noon, depende sa iyong mga setting, ginagamit ng Google ang impormasyong iyon, pati na rin ang aktibidad mo sa Google, para mas makatulong sa iyo at mas ma-personalize ang mga experience mo sa mga serbisyo ng Google, kasama na ang Assistant. Halimbawa, kung itatanong mo ang "Kailan ang kaarawan ng nanay ko?" sasagutin ng Assistant ang iyong tanong gamit ang impormasyon mula sa Calendar mo. O kung itatanong mo ang “Kailangan ko ba ng payong bukas?" gagamitin ng Assistant ang lokasyon mo para maibigay sa iyo ang pinakaangkop na sagot.

Puwede mong i-delete ang iyong aktibidad nang manual sa Aking Aktibidad, i-set up ang awtomatikong pag-delete, o i-off ang Aktibidad sa Web at App nang tuluyan, na maglilimita sa naka-personalize na experience sa Google Assistant at sa iba pang serbisyo ng Google. Puwede mong tingnan at i-delete ang iyong aktibidad sa Google Assistant sa pamamagitan ng pagbisita sa iyong Aktibidad ng Assistant, na maa-access sa pamamagitan ng mga app ng Google Home at Google Assistant at online sa myactivity.google.com.

Pakibasa ang Patakaran sa Privacy ng Google, ang Mga Madalas Itanong tungkol sa Privacy: Google Nest, at ang aming dedikasyon sa privacy sa bahay para maunawaan kung anong data ang kinokolekta ng Google, bakit namin ito kinokolekta, at ang mga setting at tool na available sa iyo para i-update, pamahalaan, i-export, at i-delete ang impormasyon mo kapag gumagamit ka ng aming mga device at serbisyo.

Puwede bang makolekta ng Google Assistant ang data ng boses ko nang hindi sinasadya? Ano ang mangyayari kung gagawin nito iyon at ano ang mga opsyon ko?

Puwedeng mag-activate ang Google Assistant kahit hindi mo ito gustong mag-activate dahil nagkamali ito sa pagtukoy na hiningi mo ang tulong nito - halimbawa, kapag may ingay na parang “Ok Google” o hindi mo sinasadyang i-activate nang manual ang iyong device. Kung mangyari iyon, at na-on ang iyong Aktibidad sa Web at App, puwede mong sabihin ang “Hey Google, that wasn't for you (Ok Google, hindi iyon para sa iyo),” at ide-delete ng Assistant ang sinabi mo mula sa Aking Aktibidad. Puwede mo ring suriin at i-delete ang iyong mga pakikipag-ugnayan sa Assistant sa Aking Aktibidad anumang oras. Kung nag-activate ang Google Assistant nang hindi mo ito sinasadya, at naka-disable ang setting mo ng Aktibidad sa Web at App, hindi iso-store ang iyong pakikipag-ugnayan sa Assistant sa Aking Aktibidad. Para mas iangkop ang Google Assistant sa iyong kapaligiran, puwede mong isaayos kung gaano kasensitbo ang Assistant mo sa mga parirala para sa pag-activate (tulad ng “Ok Google”) sa pamamagitan ng Google Home app para sa mga smart speaker at smart display.

Ano ang ilang uri ng paraan ng pag-activate?    

Maa-activate mo ang iyong Google Assistant sa maraming paraan. Halimbawa, puwede mong sabihin ang “Ok Google,” gamitin ang ibang paraan ng pag-activate gaya ng Look and Talk sa iyong Nest Hub Max, o pindutin nang matagal ang Google Nest device mo. Ipinapaalam sa iyo ng status indicator sa device mo, gaya ng mga nagfa-flash na tuldok, kung kailan naka-activate ang Assistant.

Paggamit ng data

Anong ginagawa ng Google sa data na kinokolekta nito kapag ginagamit ko ang Assistant?

Pinapangasiwaan ng Google ang iyong data gaya ng inilalarawan sa Patakaran sa Privacy ng Google. Kung gumagamit ka ng aming mga device at serbisyo para sa nakakonektang home, pakibasa rin ang dedikasyon ng Google sa privacy sa tahanan at ang Mga Madalas Itanong tungkol sa Privacy: Google Nest, kung saan ipinapaliwanag namin ang ilang limitasyong itinakda ng Google sa kung paano pinapangasiwaan ang iyong data. Ipinapaliwanag ng aming video na privacy sa Google Assistant kung paano pinapangasiwaan ang iyong data ng audio sa Assistant kapag nakipag-ugnayan ka sa Google Assistant, at kung paano pinoprotektahan ng Google Assistant ang privacy mo at kung paano ka nito binibigyan ng transparency, pagpipilian, at kontrol.

Storage ng data

Saan ninyo sine-save ang data ko?

Nagso-store ang Google ng data tungkol sa iyong mga pakikipag-ugnayan sa Google Assistant sa mga server nito, na nasa mga data center nito. Para sa higit pang impormasyon, puwede mong bisitahin ang https://www.google.com/about/datacenters/. Puwede mong tingnan at i-delete ang mga dati mong pakikipag-ugnayan sa Google Assistant sa Aking Aktibidad. Alamin ang tungkol sa Google Assistant at iyong privacy.   

Lokal na sino-store at pinoproseso sa iyong device ng ilang device at serbisyo ng Google Nest, gaya ng Google Nest Hub Max, ang ilan sa iyong data, at hindi sa mga server ng Google. Para matuto pa, pakibasa ang Mga FAQ tungkol sa camera sensing at Mga FAQ tungkol sa Face Match.

Pinapanatili ba ng Google Assistant ang mga audio recording ko?    

Bilang default, hindi namin pinapanatili ang iyong mga recording ng audio sa mga server ng Google. Puwede kang magpasyang i-save ang audio mo sa iyong Google Account para gawing mas kapaki-pakinabang para sa iyo at mas maganda para sa lahat ang mga produkto sa speech ng Google. Bisitahin ang iyong data sa Assistant para matuto pa tungkol sa kung paano pinapagana ng data mo ang Assistant para sa iyo.

Puwede ko bang tingnan kung ano ang naitanong ko na sa aking device gamit ang Google Assistant / Kung ano na ang narinig ng aking Google Nest device?

Puwede mong bisitahin ang iyong tool na Aktibidad ng Assistant anumang oras para suriin o i-delete ang data mula sa mga pakikipag-ugnayan mo sa iyong Assistant. Para kontrolin ang aktibidad ng Assistant mo gamit ang iyong boses, puwede ka ring magsabi lang ng katulad ng, “Hey Google, delete what I said this week (Ok Google, i-delete ang sinabi ko ngayong linggo)," at ide-delete ng Google Assistant ang mga audio recording mo mula sa Aking Aktibidad. Puwede mo ring piliing awtomatikong i-delete ang iyong aktibidad. Matuto pa tungkol sa Google Assistant at iyong privacy.

Paano ko babaguhin kung ano ang alam ng Google tungkol sa akin?

Puwede mong limitahan ang data na kinokolekta ng Google sa pamamagitan ng pagsusuri at pag-update sa mga setting ng iyong Google Account anumang oras. Puwede mo ring suriin at i-delete ang iyong aktibidad sa pakikipag-ugnayan gamit ang boses sa pamamagitan ng pagbisita sa Aktibidad ng Assistant mo. Alamin kung paano ginagamit ng Google Assistant ang data mo sa iyong data sa Assistant.

Puwede mo ring kontrolin ang iyong privacy sa Assistant gamit lang ang boses mo. Magtanong ng mga bagay gaya ng “Saan ko mababago ang mga setting ng privacy ko?” para makakuha ng mga sagot sa mga pinakakaraniwang tanong sa privacy at seguridad.

Seguridad ng data

Ligtas ba ang data ko sa Google?

Priyoridad namin ang iyong seguridad sa lahat ng aming ginagawa. Pumunta sa myaccount.google.com para maunawaan kung paano namin pinapanatiling protektado ang iyong account at para magkumpleto ng Security Checkup.

Pag-delete ng data

Ano ang mangyayari sa impormasyon ko kung ia-uninstall ko ang Google Home app / ide-delete ko ang account ko?

Anumang oras, puwede mong piliing i-delete ang iyong bahay sa Google Home app, o ang Google Account mo (account.google.com), pero kung ia-uninstall mo lang ang iyong Google Home app, hindi nito made-delete ang account mo o ang impormasyon ng iyong bahay. Matuto tungkol sa kung paano mag-delete at mag-alis ng access sa mga Google Nest device. 

Paano ko ide-delete ang paghahanap / lokasyon / history at mga recording ng boses ko? 

Puwede mong i-delete ang iyong aktibidad sa Google Home app o sa myactivity.google.com.

Ang Google Assistant at ang aking privacy

Nire-record ba ng aking Google Nest device ang lahat ng pakikipag-usap ko?

Hindi. Puwede kang matuto pa tungkol sa kung paano pinoprotektahan ng Google Assistant ang privacy mo at kung paano ito nagbibigay sa iyo ng transparency, pagpipilian, at kontrol.

Nakakaimpluwensya ba ang mga pakikipag-ugnayan ko sa Assistant sa mga ad na nakikita ko sa Google?

Depende sa iyong mga setting, kapag nakipag-ugnayan ka sa Assistant mo gamit ang boses, puwede naming gamitin ang text ng mga pakikipag-ugnayang iyon para pagbatayan ng iyong mga interes para sa pag-personalize ng ad. Puwede mong suriin ang iyong mga setting ng Google anumang oras para kontrolin ang mga nakikita mong ad, kasama na ang tuluyang pag-opt out sa pag-personalize ng ad. Matuto pa tungkol sa Google Assistant at sa mga mapagpipilian mo.

Puwede bang ma-activate ang Assistant kahit hindi ko ito gustong i-activate?

Puwedeng mag-activate ang Google Assistant kahit hindi mo ito gustong mag-activate dahil nagkamali ito sa pagtukoy na hiningi mo ang tulong nito  - halimbawa, kapag may ingay na parang “Ok Google,” hindi sinasadyang manual na pag-activate ng device, o, para sa Look and Talk, kung direkta kang nakatingin sa iyong Nest Hub Max habang nakikipag-usap sa iba. Puwede kang matuto pa sa pamamagitan ng pagbabasa tungkol sa kung paano pinoprotektahan ng Google Assistant ang iyong privacy at kung paano ka nito nabibigyan ng transparency, opsyon, at kontrol.

Sino ang nakakarinig ng history ng lokasyon / paghahanap / pakikipag-usap ko?

Puwedeng humingi ang sinumang malapit sa iyong Google speaker o display device ng impormasyon mula rito, at kung nagbigay ka sa  device mo ng access sa iyong mga kalendaryo, Gmail, o iba pang personal na impormasyon, puwedeng mahingi ng mga tao sa device mo ang impormasyong iyon, depende sa iyong mga setting ng personal na resulta at mga setting ng Voice Match. Maa-access din ng mga empleyado at pinagkakatiwalaang third party ng Google ang iyong history ng pakikipag-ugnayan alinsunod sa Patakaran sa Privacy ng Google. Matuto pa tungkol sa mga bisita at iyong mga device para sa nakakonektang home ng Google.

Google Account at mga setting

Paano ko iko-configure ang mga setting ng Google Account ko kapag ginamit ko ito para pamahalaan ang aking mga device para sa home? 

Puwede mong gamitin ang aming mga device at serbisyo para sa nakakonektang home sa pamamagitan ng Google Account. Nagbibigay sa iyo ang Google Account mo ng mabilisang access sa mga setting at tool na nagbibigay-daan sa iyong pag-ingatan ang data mo at protektahan ang iyong privacy. Pumunta sa Google Account mo para pamahalaan ang iyong mga setting ng privacy at suriin ang data ng aktibidad mo sa Google. Available din sa iyo ang mga karagdagang setting ng tahanan at device sa Nest app at Home app. Matuto tungkol sa kung paano mag-delete at mag-alis ng access sa mga Google Nest device. 

Paano ko ide-delete ang Google Account ko?

Ganito i-delete ang iyong Google Account.

Mga Serbisyo 

Tandaan: Hindi kasama sa mga serbisyong tinutukoy sa ibaba ang mga serbisyo sa musika, home control, balita, at video na gumagana sa iyong device para sa nakakonektang home ng Google.

Ibinebenta ba ng Google ang impormasyon ko sa kahit sino / mga contact ko / mga partner ng Google / iba pang app / mga advertiser / iba pang kumpanya?

Hinding-hindi. Hindi namin ibinebenta ang iyong personal na impormasyon sa kahit sino. May ilang pagkakataon kung saan nagbabahagi kami ng impormasyon sa mga third party, na nakalista sa Patakaran sa Privacy ng Google. Halimbawa, kung humiling ka ng serbisyo mula sa negosyong tulad ng Grab gamit ang device para sa nakakonektang home ng Google, magpapadala kami ng impormasyong ibinigay mo sa serbisyong iyon para makapag-book o makapagkumpirma ng biyahe. Sa mga ganitong sitwasyon, nahiling na namin sa iyong bigyan kami ng pahintulot na ibahagi ang impormasyong iyon sa serbisyong iyon.

Puwede bang i-save ng mga serbisyo ang history ng pakikipag-ugnayan ko?

Pakitandaang kapag gumamit ka ng mga serbisyo ng third party sa aming mga device at serbisyo para sa nakakonektang home, masasaklawan din ng sariling mga tuntunin at patakaran sa privacy ng mga ito ang paggamit mo sa mga serbisyong iyon. Suriin nang mabuti ang mga iyon habang ginagamit mo ang iba pang serbisyong iyon. Halimbawa, para mas mabilis at mas madali kang matulungan, puwedeng gamitin ng isang serbisyo ang impormasyon mula sa mga dati nitong pakikipag-ugnayan sa iyo.

Dagdag pa rito, matatandaan ng isang serbisyong nagrerekomenda ng mga concert sa iyong lugar ang mga kagustuhan mo sa musika kung ibabahagi mo ang mga iyon sa serbisyong iyon, kaya hindi mo na ito kailangang sabihin sa kanila palagi. Matuto pa tungkol sa kung paano piliin kung aling mga serbisyo ang makakatanda sa iyo.

Makukuha ba ng isang serbisyo ang impormasyon ng Google Account ko?

Bago makita ng isang serbisyo ang alinman sa impormasyong naka-store sa account mo (gaya ng iyong email address, pangalan, o mga contact), hihingin muna nito ang pahintulot mo. Hindi kami magbabahagi ng personal na impormasyon gaya ng iyong pangalan, email, o address, sa isang serbisyo nang walang pahintulot mo. Pakitandaang kapag gumamit ka ng mga serbisyo ng third party sa aming mga device at serbisyo para sa nakakonektang home, masasaklawan ng sariling mga tuntunin at patakaran sa privacy ng mga ito ang paggamit mo sa mga serbisyong iyon, kaya mag-ingat kung kanino mo pipiliing bahagian ng impormasyon.

Halimbawa, kung gumagamit ka ng serbisyo para maghanap ng mga tuberong nasa malapit, puwede nitong itanong:

“Para makapagrekomenda ako ng tuberong nasa malapit, kailangan kong kunin ang address ng kalye mo sa Google. Ok lang ba?”

Puwede mong tanggapin o tanggihan ang kahilingan.

Nakakakuha ba ang third-party na service provider ng audio recording ng sinabi ko?

Hindi kami nagbabahagi ng mga query sa Assistant sa mga partner ng Works with Google Assistant. Tina-transcribe ng Google ang sinasabi mo at ipinapadala nito ang text, pero hindi ang audio, sa third-party na partner.