Ginagamit ng Mga Chromebook ang prinsipyong "pagprotekta nang mabuti" para makapagbigay ng maraming layer ng proteksyon, kaya kung ma-bypass ang alinmang layer, gagana pa rin ang iba pa. Kaya bagama't mahalaga pa ring mag-ingat upang maprotektahan ang iyong data, hinahayaan ka ng Mga Chromebook na mag-relax nang kaunti. Naka-built in sa iyong Chromebook ang mga sumusunod na feature ng seguridad:
Mga awtomatikong pag-update
Ang pinakamabisang paraan upang labanan ang malware ay tiyaking napapanahon ang lahat ng software at mayroong mga pinakabagong pag-aayos para sa seguridad. Maaaring mahirap itong gawin sa mga tradisyonal na operating system na maraming bahagi ng software mula sa maraming vendor na may iba't ibang mekanismo ng pag-update at user interface. Awtomatikong pinapamahalaan ng Mga Chromebook ang mga update nang sa gayon ay palaging pinapatakbo ng Mga Chromebook ang pinakabago at pinaka-secure na bersyon.
Pag-sandbox
Sa isang Chromebook, tumatakbo ang bawat web page at application sa isang pinaghihigpitang environment na tinatawag na "sandbox." Kung madirekta ang Chromebook sa isang pahinang may malware, hindi nito maaapektuhan ang iba pang mga tab o apps sa computer, o anupamang nasa computer. Pinapanatili sa isang lugar ang malware.
Na-verify na Pag-boot
Kahit makalabas sa sandbox ang malware, protektado pa rin ang Chromebook. Sa tuwing bubuksan ang Chromebook, magsasagawa ito ng pagsusuri sa sarili na tinatawag na "Na-verify na Pag-boot." Kung mapag-alaman nito na nagalaw o nasira ang system sa anumang paraan, karaniwan ay madali nitong maaayos ang sarili nito, at ibabalik nito ang Chromebook sa isang operating system na parang bago lang.
Pag-encrypt ng Data
Kapag gumagamit ng web apps sa isang Chromebook, ligtas na iniimbak sa cloud ang lahat ng mahalagang data. Ang ilang partikular na uri ng mga file, gaya ng mga pag-download, cookies, at mga file sa cache ng browser, ay maaaring nasa computer pa rin. Ine-encrypt ng Chromebook ang data na ito gamit ang hardware na hindi madaling mapasok, kung kaya't mahihirapan ang sinuman na i-access ang mga file na iyon.
Mode ng Pagbawi
Kung magkaproblema ang isang Chromebook, puwede kang pumindot lang ng isang button o gumamit ng mabilis na kumbinasyon sa keyboard para pumasok sa recovery mode at i-restore ang operating system sa isang alam na maayos na bersyon.